DIAMOND CITY NEWS, SURAT
વૈશ્વિક હીરા બજારમાં મોટા અને ઉત્કૃષ્ટ ગુણવત્તા ધરાવતા રફ હીરાની સતત વધતી માગના આધારે આંતરરાષ્ટ્રીય માઇનિંગ કંપની ‘જેમ ડાયમંડ્સ’ (Gem Diamonds)ની આવકમાં જોરદાર ઉછાળો નોંધાયો છે. વર્ષ ૨૦૨૬ના પ્રથમ છમાસિક ગાળામાં કંપનીની કુલ આવક ૩૩% વધીને $૫૯.૫ મિલિયન (અંદાજે ₹૪૯૫ કરોડથી વધુ) પર પહોંચી ગઈ છે.
કંપની દ્વારા જાહેર કરાયેલા સત્તાવાર અહેવાલ મુજબ, આ સમયગાળા દરમિયાન હીરાના વેચાણનું પ્રમાણ ૪% ઘટીને ૪૨,૬૨૪ કેરેટ રહ્યું હોવા છતાં, ઊંચી કિંમતોને કારણે આવકમાં મોટો ગ્રોથ મળ્યો છે. કંપનીની પ્રખ્યાત ‘લેટસેંગ માઇન’ (Letšeng Mine) ખાતેથી મળેલા હીરાની સરેરાશ વેચાણ કિંમત ૩૮% વધીને $૧,૩૯૫ પ્રતિ કેરેટ થઈ ગઈ છે.
આફ્રિકન દેશ લેસોથોમાં આવેલી લેટસેંગ માઇનમાં જેમ ડાયમંડ્સ ૭૦% હિસ્સેદારી ધરાવે છે, જે વિશ્વભરમાં પોતાના વિશાળ અને અત્યંત મૂલ્યવાન સફેદ હીરાઓ માટે જાણીતી છે. ચાલુ વર્ષના પ્રથમ છ મહિનામાં કંપનીએ $૧ મિલિયન (આશરે ₹૮.૩ કરોડ) કરતાં વધુ કિંમતના આઠ મોટા હીરા વેચીને કુલ $૧૬.૧ મિલિયન એકત્ર કર્યા હતા. જેમાં સૌથી આકર્ષક ૫૨.૨૪ કેરેટનો સફેદ હીરો હતો, જે $૩૨,૯૦૮ પ્રતિ કેરેટના રેકોર્ડ ભાવે વેચાયો હતો.
હીરા ઉદ્યોગની વર્તમાન સ્થિતિ અંગે જણાવતા જેમ ડાયમંડ્સના સીઇઓ ક્લિફોર્ડ એલ્ફિકે જણાવ્યું હતું કે, “સિન્થેટિક એટલે કે લેબ-ગ્રોન હીરાના કારણે નાના અને નિમ્ન ગુણવત્તાવાળા રફ હીરાના ભાવ પર ખૂબ માઠી અસર પડી છે, જેના કારણે વિશ્વમાં કેટલીક ખાણોનું કામકાજ પણ અટકી ગયું છે. પરંતુ લેટસેંગ ખાણ તેની ઉત્કૃષ્ટ ગુણવત્તા અને દુર્લભ મોટા હીરા માટે જાણીતી હોવાથી તેના પર આ મંદીની ખાસ અસર થઈ નથી. પ્રથમ છમાસિક ગાળામાં મોટા હીરા માટે ખરીદદારોનો સકારાત્મક ઉત્સાહ જોવા મળ્યો છે.”
ઉત્પાદનની દ્રષ્ટિએ, આ છ મહિનામાં કુલ ઉત્પાદન ૧૨% ઘટીને ૪૧,૬૯૫ કેરેટ રહ્યું છે. ઉત્પાદનમાં આ ઘટાડાનું મુખ્ય કારણ હાઇ-ગ્રેડ ‘સેટેલાઇટ પાઇપ’ને બદલે લોઅર-ગ્રેડ ‘મેઇન પાઇપ’માંથી વધુ ઉત્ખનન કરવાનું હતું. વર્ષના બાકીના ભાગમાં પણ કંપની સેટેલાઇટ પાઇપના વિસ્તરણ (Cutback)ની તૈયારી કરી રહી હોવાથી માત્ર મેઇન પાઇપમાંથી જ ઉત્પાદન મેળવશે.
આ સમયગાળા દરમિયાન કંપનીને ૧૦૦ કેરેટથી વધુ વજન ધરાવતા ત્રણ વિશાળ હીરા મળી આવ્યા હતા, જેમાંથી બે હીરાનું વેચાણ પૂર્ણ થઈ ચૂક્યું છે. જૂન મહિનામાં કંપનીને ૩૪૬.૯૯ કેરેટનો એક દુર્લભ અને અસાધારણ હીરો મળ્યો હતો, જેનું વેચાણ હજુ બાકી છે. લેસોથો દેશના ૬૦મા સ્વતંત્રતા દિવસ (૪ ઓક્ટોબર)ની યાદમાં આ ઐતિહાસિક હીરાનું નામ ‘લેસોથો જુબિલી‘ (Lesotho Jubilee) રાખવામાં આવ્યું છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
