DIAMOND CITY NEWS, SURAT
વિશ્વની સૌથી મોટી ડાયમંડ માઇનિંગ કંપની પૈકીની એક, રશિયાની ALROSA એ એક અભૂતપૂર્વ સીમાચિહ્ન સર કર્યું છે.
કંપનીના સત્તાવાર વેચાણ વિભાગ, ‘યુનાઇટેડ સેલિંગ ઓર્ગેનાઇઝેશન’ (USO) એ તેની સ્થાપનાથી અત્યાર સુધીના 30 વર્ષના ઈતિહાસમાં અંદાજે 1 અબજ કેરેટ (100 કરોડ કેરેટ) હીરાનું વેચાણ પૂર્ણ કર્યું છે.
આ આંકડો એટલો વિશાળ છે કે જો આ તમામ હીરાનું વજન કરવામાં આવે તો તે લગભગ 200 ટન જેટલું થાય છે.
યાકુતિયાની ખાણોથી સુરતના કારખાના સુધી
રશિયાના અતિ ઠંડા પ્રદેશો એવા યાકુતિયા અને આર્ખાંગેલ્સ્કની ખાણોમાંથી નીકળતા કાચા હીરા (રફ) સીધા વેચાણ માટે નથી જતા. તે સૌપ્રથમ USO પાસે પહોંચે છે, જ્યાં હીરાનું સોર્ટિંગ, એક્સપર્ટ ઇવેલ્યુએશન અને પ્રી-સેલ તૈયારીઓ કરવામાં આવે છે.
વર્ષ 1996 માં સ્થપાયેલી આ સંસ્થાએ રશિયન હીરાને વૈશ્વિક બજારમાં સ્થાપિત કરવામાં કરોડરજ્જુ સમાન ભૂમિકા ભજવી છે. ખાસ કરીને સુરતના હીરા ઉદ્યોગ માટે ALROSA સૌથી મોટી રફ સપ્લાયર રહી છે.
ઐતિહાસિક રેકોર્ડ્સ અને હાઈલાઈટ્સ :
- વેચાણનો રેકોર્ડ : કંપનીએ વર્ષ 2021 માં તેની અત્યાર સુધીની સૌથી વધુ વાર્ષિક નિકાસ નોંધાવી હતી, જેમાં 4.55 કરોડ કેરેટ હીરાનું વેચાણ થયું હતું.
- સૌથી મોટો હીરો : ગત વર્ષે એટલે કે 2025 માં, USO માંથી અત્યાર સુધીનો સૌથી મોટો જેમ-ક્વોલિટી ડાયમંડ પસાર થયો હતો. આ 468.3 કેરેટનો વિશાળ ‘ફેન્સી એમ્બર’ (ચમકદાર કેસરી-પીળો) રંગનો હીરો હતો.
- ટેકનોલોજીનો ઉપયોગ : આધુનિક યુગ સાથે તાલ મિલાવવા માટે ALROSA એ તેના સોર્ટિંગ વિભાગમાં 60% થી 90% કામકાજ મશીન દ્વારા ઓટોમેટિક કરી દીધું છે. જોકે, અંતિમ મૂલ્યાંકન તો માનવ નિષ્ણાતો દ્વારા જ કરવામાં આવે છે.
CEOનું નિવેદન : રશિયાનું વિશ્વ બજારમાં પ્રભુત્વ
ALROSA ના CEO પાવેલ મરીનીચેવ (Pavel Marinychev) એ આ સિદ્ધિ પર ગર્વ વ્યક્ત કરતા જણાવ્યું હતું કે, “ત્રણ દાયકાના પરિશ્રમથી અમે એક એવું માર્કેટિંગ મોડેલ તૈયાર કર્યું છે જે આંતરરાષ્ટ્રીય ધોરણો પર ખરું ઉતરે છે. અમારા નિષ્ણાતોના કારણે જ રશિયન હીરા આજે ગુણવત્તા અને ભરોસાનું પ્રતીક બન્યા છે.”
ભારત માટે આ સમાચાર કેમ મહત્વના?
ભારત અને રશિયા વચ્ચે હીરાના વેપારના સંબંધો અત્યંત જૂના છે. રશિયાથી આવતા હીરાનું સૌથી વધુ પોલિશિંગ ભારત (ખાસ કરીને સુરત) માં થાય છે.
જોકે, હાલમાં રશિયન હીરા પર લાગેલા આંતરરાષ્ટ્રીય પ્રતિબંધોને કારણે સપ્લાય ચેઈનમાં મુશ્કેલીઓ છે, પરંતુ ALROSA ની આ મજબૂત પકડ દર્શાવે છે કે રશિયન હીરા વગર વૈશ્વિક ડાયમંડ માર્કેટ અધૂરું છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
