આદિત્ય બિરલાની ‘ઇન્દ્રિયા’ એ ડાયમંડ સેક્ટરમાં સ્થાપ્યો નવો બેન્ચમાર્ક

DIAMOND CITY NEWS, SURAT

ભારતીય આભૂષણ બજારમાં ટૂંકા સમયમાં પોતાની મજબૂત ઓળખ બનાવનાર આદિત્ય બિરલા ગ્રુપના જ્વેલરી બ્રાન્ડ ‘ઇન્દ્રિયા’ (Indriya) એ નેચરલ ડાયમંડ (કુદરતી હીરા) ની પસંદગીમાં એક નવો અને ક્રાંતિકારી બેન્ચમાર્ક સ્થાપિત કર્યો છે.

હીરાની ખરીદીમાં ગ્રાહકોનો ભરોસો વધુ દ્રઢ કરવા માટે કંપનીએ ડાયમંડ સિલેક્શનના માપદંડો વૈશ્વિક સ્તરે અપગ્રેડ કર્યા છે. કંપનીનું માનવું છે કે, હીરાની અસલી ઓળખ તેની ‘ચમક’ (Sparkle) છે, જે તેની ગુણવત્તાની સૌથી સચોટ અભિવ્યક્તિ છે. આ અભિગમ સાથે ઇન્દ્રિયા ભારતીય ગ્રાહકો માટે હીરા ખરીદવાનો એક સંપૂર્ણ નવો અને પારદર્શક અનુભવ લાવ્યું છે.

પરંપરાગત રીતે અત્યાર સુધી હીરાની ગુણવત્તા માત્ર 4Cs (કેરેટ, કલર, ક્લેરિટી અને કટ) ના આધારે જ નક્કી થતી આવી છે. પરંતુ, ઇન્દ્રિયા આનાથી પણ એક ડગલું આગળ વધીને હીરાના કટ અને સિલેક્શનમાં તેના લાઇટ પરફોર્મન્સ (Light Performance) નું મૂલ્યાંકન કરે છે.

એટલે કે, હીરા પર પડતો પ્રકાશ તે કેવી રીતે રિફ્લેક્ટ (પરાવર્તિત) અને રિફ્રેક્ટ (વક્રીભવન) કરીને પાછો ફેંકે છે તેની ચકાસણી કરવામાં આવે છે. આ આકરી વૈજ્ઞાનિક કસોટીના કારણે જ બજારમાં ઉપલબ્ધ દર 5 માંથી માત્ર 1 જ નેચરલ ડાયમંડ (માત્ર ૨૦% હીરા) ઇન્દ્રિયાના ઉચ્ચ માપદંડોમાં ખરો ઉતરે છે.

સુરત-મુંબઈ માટે આ પરિવર્તન શા માટે મહત્વનું?

ભારત વૈશ્વિક હીરા ઉદ્યોગનું હૃદય છે. વિશ્વના ૯૦% થી વધુ હીરાનું કટિંગ અને પોલિશિંગ ગુજરાતના સુરત અને મહારાષ્ટ્રના મુંબઈ જેવા વિસ્તારોમાં થાય છે. આટલી અદભુત કુશળતા અને વૈશ્વિક પ્રભુત્વ હોવા છતાં, ભારતમાં કુલ જ્વેલરી માર્કેટમાં ડાયમંડ જ્વેલરીનો વપરાશ હજુ પણ ૧૫% કરતા ઓછો છે. ભારતીય ગ્રાહકો હજી પણ સોના તરફ વધુ ઝુકાવ ધરાવે છે.

આ સ્થિતિને બદલવા અને ગ્રાહકોમાં હીરા પ્રત્યે આકર્ષણ વધારવા ઇન્દ્રિયાએ આ પહેલ કરી છે. હીરાના યોગ્ય પ્રપોશન (માપ) અને સુપિરિયર લાઇટ રિટર્નને પ્રાથમિકતા આપીને બ્રાન્ડ દેશમાં સૌથી વધુ ચમકતા હીરા ગ્રાહકો સમક્ષ રજૂ કરી રહી છે, જેથી ભારતીય ગ્રાહકો હીરાના મૂલ્યાંકનની પરંપરાગત રીતોથી ઉપર ઉઠી શકે.

કંપનીના આ ક્રાંતિકારી કદમ અંગે ઇન્દ્રિયાના સીઇઓ (CEO) સંદીપ કોહલીએ જણાવ્યું હતું કે, “ડાયમંડ ઇન્ડસ્ટ્રી ઝડપથી બદલાઈ રહી છે અને ઇનોવેશન સમયની માંગ છે. દાયકાઓથી ગુણવત્તાની ચર્ચા માત્ર 4Cs પર થતી આવી છે, પરંતુ વાસ્તવમાં ગ્રાહક એ જ હીરાના પ્રેમમાં પડે છે જે સૌથી વધુ ચમકતો હોય. ગ્રાહકની નજર સૌથી પહેલા ચમક પર જ જાય છે. ઇન્દ્રિયામાં અમે આ ચમકને ખરીદીના કેન્દ્રબિંદુમાં લાવ્યા છીએ. અમારો હેતુ ગ્રાહકો માટે હીરાની ખરીદી સરળ, સાહજિક અને વધુ દ્રશ્યમાન બનાવવાનો છે. ગ્રાહકોને દરેક કેટેગરી અને પ્રસંગ માટે શ્રેષ્ઠ અને સૌથી વધુ ચમકતા હીરા મળી રહે તે અમારો સંકલ્પ છે.”

આ અંગે કંપનીના હેડ ઓફ સપ્લાય ચેઈન રાજેન્દ્રન ગણપતિએ ઉમેર્યું કે, “જો ગ્રાહકોને હીરામાં ચમક સૌથી વધુ ગમતી હોય, તો અમારો સિલેક્શન બેન્ચમાર્ક પણ એ જ હોવો જોઈએ. બજારના શ્રેષ્ઠ હીરાઓમાંથી પણ હેન્ડપિક કરીને અમે માત્ર ૧/૫ ભાગના હીરા જ પસંદ કરીએ છીએ જેથી ગ્રાહકોને આજીવન આકર્ષિત રાખે તેવી ગુણવત્તા મળી રહે.”

આ લોન્ચિંગ પ્રસંગે માર્કેટિંગ અને વિઝ્યુઅલ મર્ચેન્ડાઇઝિંગ હેડ શાંતિસ્વરૂપ પંડા સહિત કંપનીના ઉચ્ચ અધિકારીઓ ઉપસ્થિત રહ્યા હતા. આદિત્ય બિરલા ગ્રુપના આ નવા અભિગમથી આગામી સમયમાં ભારતીય રિટેલ ડાયમંડ માર્કેટના સમીકરણો બદલાય તેવી પૂરી સંભાવના છે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube