DIAMOND CITY NEWS, SURAT
વૈશ્વિક લક્ઝરી માર્કેટની દિગ્ગજ સ્વિસ કંપની રિચમોન્ટ (Richemont) માટે ચાલુ નાણાકીય વર્ષનો પ્રથમ ત્રિમાસિક ગાળો (Q1) ખૂબ જ શાનદાર રહ્યો છે. વૈશ્વિક સ્તરે આર્થિક અનિશ્ચિતતાઓ વચ્ચે પણ પ્રીમિયમ જ્વેલરી બ્રાન્ડ્સની ભારે માંગને કારણે કંપનીના વેચાણમાં જોરદાર તેજી જોવા મળી છે.
ખાસ કરીને કાર્તિયર (Cartier) અને વેન ક્લીફ એન્ડ અર્પેલ્સ (Van Cleef & Arpels) જેવી વૈશ્વિક સ્તરે પ્રખ્યાત બ્રાન્ડ્સ ધરાવતા રિચમોન્ટના જ્વેલરી ડિવિઝને વાર્ષિક ધોરણે ૨૧% નો બમ્પર ગ્રોથ નોંધાવ્યો છે. ૩૦ જૂનના રોજ પૂરા થયેલા ત્રણ મહિના દરમિયાન આ સેગમેન્ટનું કુલ વેચાણ વધીને ૪.૭૩ અબજ યુરો (આશરે ૫.૪ અબજ ડોલર) પર પહોંચી ગયું છે.
ઉલ્લેખનીય છે કે, કંપનીના જ્વેલરી સેગમેન્ટે આ સતત સાતમા ક્વાર્ટરમાં ડબલ-ડિજિટ (બે આંકડામાં) વૃદ્ધિ જાળવી રાખીને બજારમાં એક નવો રેકોર્ડ સ્થાપિત કર્યો છે. જો સ્થિર વિનિમય દર પર ગણતરી કરવામાં આવે તો આ વૃદ્ધિ ૨૪% જેટલી ઊંચી રહેવા પામી છે.
વૈશ્વિક બજારોની વાત કરીએ તો, કંપનીને તમામ ભૌગોલિક વિસ્તારોમાં સ્થાનિક ગ્રાહકો તરફથી જબરદસ્ત પ્રતિસાદ મળ્યો છે. અમેરિકામાં વેચાણમાં ૨૫% અને જાપાનમાં ૨૦% નો રેકોર્ડબ્રેક વધારો નોંધાયો છે. આ ઉપરાંત, એશિયા પેસિફિક, યુરોપ, મિડલ ઇસ્ટ અને આફ્રિકાના બજારોમાં પણ સ્થાનિક માંગને કારણે વેચાણ બે આંકડામાં વધ્યું છે.
ખાસ કરીને મિડલ ઇસ્ટ અને આફ્રિકન ક્ષેત્રમાં લાંબા સમય પછી ફરી એકવાર તેજીનો દોર પાછો ફર્યો છે, જે કંપની માટે સાનુકૂળ સંકેત છે. રિશમોન્ટ ગ્રૂપ હેઠળ આવતી કાર્તિયર, વેન ક્લીફ એન્ડ અર્પેલ્સ ઉપરાંત બુસેલાટી (Buccellati) અને વેરનિયર (Vhernier) જેવી લક્ઝરી બ્રાન્ડ્સે આ ઐતિહાસિક સફળતામાં મુખ્ય ભૂમિકા ભજવી છે.
બીજી તરફ, કંપનીના સ્પેશિયાલિસ્ટ વોચમેકર્સ (ઘડિયાળ ઉત્પાદન) ડિવિઝને પણ બજારમાં સારું પ્રદર્શન કર્યું છે. પિઆજે (Piaget), એ. લેન્ગે એન્ડ સોહ્ને (A. Lange & Söhne) અને વેશેરોન કોન્સ્ટેન્ટિન (Vacheron Constantin) જેવી પ્રીમિયમ ઘડિયાળ બ્રાન્ડ્સનું વેચાણ ૬% વધીને ૮૭૩ મિલિયન યુરો (આશરે ૯૯૭.૪ મિલિયન ડોલર) નોંધાયું છે.
જોકે, ચીન, હોંગકોંગ અને મકાઉ જેવા મોટા એશિયન બજારોમાં આર્થિક મંદી અને ગ્રાહકોના બદલાતા વલણને કારણે ઘડિયાળોના વેચાણમાં આંશિક ઘટાડો જોવા મળ્યો હતો. પરંતુ એશિયાના અન્ય દેશો અને અમેરિકા તેમજ જાપાનના મજબૂત બજારોએ આ ઘટાડાની પુરાંત સરભર કરી લીધી હતી.
એકંદરે, જ્વેલરી, ફેશન પ્રોડક્ટ્સ, એક્સેસરીઝ અને લક્ઝરી ઘડિયાળો સહિત સમગ્ર રિશમોન્ટ ગ્રૂપની કુલ સંયુક્ત આવક ૧૭% ના ઉછાળા સાથે ૬.૩૩ અબજ યુરો (આશરે ૭.૨૩ અબજ ડોલર) ના સ્તરે પહોંચી ગઈ છે, જે વૈશ્વિક લક્ઝરી સેક્ટરમાં રિશમોન્ટનો દબદબો સ્પષ્ટપણે દર્શાવે છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
