ગ્લોબલ ડાયમંડ માર્કેટમાં કતારની ધમાકેદાર એન્ટ્રી : દેશના પ્રથમ ‘કતાર ડાયમંડ એક્સચેન્જ’નું ઉદ્ઘાટન

DIAMOND CITY NEWS, SURAT

વૈશ્વિક હીરા ઉદ્યોગમાં અને મધ્ય-પૂર્વના વેપાર ક્ષેત્રે એક ઐતિહાસિક સફરની શરૂઆત કરતા, કતાર ફ્રી ઝોન્સ ઓથોરિટી (QFZ) દ્વારા દેશના સૌપ્રથમ ‘કતાર ડાયમંડ એક્સચેન્જ’ (QDE)નું વિધિવત ઉદ્ઘાટન કરવામાં આવ્યું છે. આ નવું એક્સચેન્જ હીરા અને કિંમતી રત્નોના આંતરરાષ્ટ્રીય વેપાર માટે એક અત્યાધુનિક પ્લેટફોર્મ પૂરું પાડશે, જે કતારને વૈશ્વિક ડાયમંડ ટ્રેડિંગના નકશા પર મુખ્ય કેન્દ્ર તરીકે સ્થાપિત કરશે.

કતારના રાસ બુફોન્ટાસ ફ્રી ઝોન (Ras Bufontas Free Zone) ખાતે આવેલું આ એક્સચેન્જ વેપારીઓ માટે સુરક્ષિત ટ્રેડિંગ ફ્લોર, પ્રાઇવેટ નેગોશિયેશન સૂટ્સ (ખાનગી વાટાઘાટો માટેના રૂમ), અને ચોવીસે કલાક કાર્યરત કડક સિક્યોરિટી તથા સર્વેલન્સ સિસ્ટમ ધરાવે છે. આ ઉપરાંત, વેપારને સરળ બનાવવા માટે અહીં ઓન-સાઇટ કસ્ટમ્સ ક્લિયરન્સ અને જ્વેલરી તથા હીરાના પ્રમાણીકરણ (સર્ટિફિકેશન) માટેની વિશેષ સુવિધાઓ પણ પૂરી પાડવામાં આવી છે.

ઉલ્લેખનીય છે કે, કતાર વર્ષ ૨૦૨૧માં જ ‘કિમ્બરલી પ્રોસેસ સર્ટિફિકેશન સ્કીમ’ (KPCS)નું પૂર્ણ સભ્ય બન્યું હતું, જે સંઘર્ષમુક્ત (કોન્ફ્લિક્ટ-ફ્રી) રફ હીરાના જવાબદાર અને પારદર્શક વેપાર પ્રત્યે દેશની પ્રતિબદ્ધતા દર્શાવે છે. ત્યાર બાદ, વર્ષ ૨૦૨૫માં કતારની કિમ્બરલી પ્રોસેસ (KP) ફ્રેમવર્ક દ્વારા QFZને એક અધિકૃત ઓથોરિટી તરીકે માન્યતા આપવામાં આવી હતી અને તેના ફ્રી ઝોનને રફ હીરાની આયાત તથા નિકાસ માટે કતારનો એકમાત્ર માન્ય એન્ટ્રી અને એક્ઝિટ પોઇન્ટ જાહેર કરવામાં આવ્યો હતો. QDE હવે હીરાના સંગ્રહ, પ્રમાણીકરણ અને નાણાકીય વ્યવહારો માટે સંપૂર્ણપણે નિયંત્રિત માળખું પ્રદાન કરે છે.

આ મહત્વપૂર્ણ લોન્ચિંગ અંગે વાત કરતા QFZના સીઈઓ શેખ મોહમ્મદ બિન હમાદ બિન ફૈઝલ અલ-થાનીએ જણાવ્યું હતું કે, “કતાર ડાયમંડ એક્સચેન્જની સ્થાપના એ આપણી અર્થવ્યવસ્થાને માત્ર તેલ અને ગેસ ક્ષેત્રથી આગળ ધપાવીને વૈવિધ્યસભર બનાવવાના પ્રયાસોનું એક મહત્ત્વનું કદમ છે. આ એક્સચેન્જ દ્વારા અમે હીરા અને કિંમતી પત્થરોની આખી સપ્લાય ચેઇનને એક જ સુરક્ષિત અને નિયંત્રિત સિસ્ટમ હેઠળ લાવી રહ્યા છીએ, જેથી વૈશ્વિક ડાયમંડ માર્કેટમાં કતારની એક વિશ્વસનીય ભાગીદાર તરીકેની સ્થિતિ વધુ મજબૂત થશે.”

આ એક્સચેન્જના સભ્યપદ અંગે વિગતો આપતા ઓથોરિટીએ સ્પષ્ટ કર્યું છે કે, તે ડાયમંડ ટ્રેડર્સ, મેન્યુફેક્ચરર્સ, હીરા કટિંગ અને પોલિશિંગ કરતા ઉદ્યોગકારો તેમજ આ ક્ષેત્ર સાથે જોડાયેલી સહાયક સેવાઓ અને ઉદ્યોગ સંગઠનો માટે ખુલ્લું રહેશે. સભ્યોને ટ્રેડિંગ લાઇસન્સ, ઓન-સાઇટ શોર્ટિંગ (હીરાનું વર્ગીકરણ), સ્વતંત્ર મૂલ્યાંકન સેવાઓ (ઇન્ડિપેન્ડન્ટ વેલ્યુએશન), અતિ-સુરક્ષિત વોલ્ટ્સ (સેફ ડાયમંડ સ્ટોરેજ) અને સ્પેશિયાલિસ્ટ ઇન્સ્યોરન્સની સુવિધા મળશે.

આગામી સમયમાં, આ એક્સચેન્જ રફ અને પોલિશ્ડ હીરા માટે શ્રેણીબદ્ધ ટેન્ડર યોજવાનું આયોજન કરી રહ્યું છે, જે આફ્રિકન અને એશિયન ઉત્પાદકોને યુરોપ અને ગલ્ફ પ્રદેશના અગ્રણી ખરીદદારો સાથે સીધા જોડવા માટે એક મહત્વપૂર્ણ સેતુ બની રહેશે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube