DIAMOND CITY NEWS, SURAT
વૈશ્વિક અર્થતંત્રમાં ફુગાવાનું દબાણ, ઊંચા વ્યાજદરો અને ભૌગોલિક-રાજકીય અસ્થિરતા જેવા અસંખ્ય પડકારો હોવા છતાં પીળી ધાતુ તરીકે જાણીતા સોનાએ આંતરરાષ્ટ્રીય બજારમાં પોતાની મજબૂત પકડ જાળવી રાખી છે.
પ્રખ્યાત ગોલ્ડ એનાલિસ્ટ સંજીવ અરોલેના તાજેતરના વિશ્લેષણાત્મક અહેવાલ અનુસાર, યુનાઇટેડ સ્ટેટ્સની નાણાકીય નીતિઓ, મધ્ય પૂર્વમાં સળગતા યુદ્ધના દ્રશ્યો અને ભારતીય બજારમાં બદલાઈ રહેલી માંગ અને આયાત નીતિઓ વચ્ચે પણ સોનામાં લાંબા ગાળાનો આશાસ્પદ દ્રષ્ટિકોણ જળવાઈ રહ્યો છે.
અમેરિકાની મધ્યસ્થ બેંક ‘યુએસ ફેડરલ રિઝર્વ’ દ્વારા ચાલુ વર્ષની પ્રથમ પાંચેય બેઠકોમાં વ્યાજદરો યથાવત રાખવામાં આવ્યા છે. અગાઉના ચેરમેન જેરોમ પોવેલ બાદ ગત 22 મેના રોજ પદભાર સંભાળનારા નવા ફેડ ચેરમેન કેવિન વૉર્શ સામે હાલમાં વ્યાજદરો વધારવાનું મોટું દબાણ સર્જાયું છે.
યુએસ-ઈરાન વચ્ચે લાંબા સમયથી ચાલી રહેલા સંઘર્ષને કારણે આંતરરાષ્ટ્રીય બજારમાં ક્રૂડ ઓઇલના ભાવ પ્રતિ બેરલ $100 ની ઉપર પહોંચી જતાં ફુગાવાનું જોખમ ઘણું વધી ગયું છે.
આ તમામ દબાણો વચ્ચે પણ જુલાઈના અંતમાં ફેડ દ્વારા વ્યાજદરો સ્થિર રાખવાના નિર્ણયથી સોનાના ભાવને નવો સપોર્ટ મળ્યો હતો, જેના કારણે ભાવ પ્રતિ ઔંસ $4,100 ની ઉપર પહોંચવામાં સફળ રહ્યા હતા.
વર્તમાન સમયમાં સોના માટે સૌથી મોટો પડકાર યુએસ-ઈઝરાયેલ અને ઈરાન વચ્ચેનો સંઘર્ષ રહ્યો છે. સામાન્ય રીતે કોઈ પણ યુદ્ધની સ્થિતિમાં સુરક્ષિત રોકાણ તરીકે સોનામાં તેજી આવતી હોય છે.
પરંતુ આ સંઘર્ષમાં પરિસ્થિતિ અલગ જોવા મળી છે; યુદ્ધ વધવાને કારણે તેલના ભાવ વધ્યા અને તેનાથી ફુગાવો વધતા ડૉલર મજબૂત થયો, જેણે સોનાના ભાવ પર દબાણ બનાવ્યું હતું. આ સિવાય યુએસ ટ્રેઝરી યીલ્ડ (બોન્ડ યીલ્ડ) પણ 5.1% થી 5.2% ની આસપાસ પહોંચી ગયા છે, જે વર્ષ 2008 ની વૈશ્વિક નાણાકીય મંદી પછીના સૌથી ઉચ્ચ સ્તરે છે.
આમ છતાં, યુએસનું $39.7 ટ્રિલિયન પર પહોંચેલું રાષ્ટ્રીય દેવું, વિશ્વભરની સેન્ટ્રલ બેંકો દ્વારા સોનાની સતત ખરીદી અને એશિયન રોકાણકારો દ્વારા ગોલ્ડ ETF માં કરાયેલું $8 અબજનું નવું રોકાણ સોનાના ભાવને સતત મજબૂતી પૂરી પાડી રહ્યું છે.
બીજી તરફ, ભારત જેવા સોનાના સૌથી મોટા વપરાશકાર દેશની વાત કરીએ તો, ‘વર્લ્ડ ગોલ્ડ કાઉન્સિલ’ ના બીજા ત્રિમાસિક ગાળાના રિપોર્ટ અનુસાર મે મહિનાના મધ્યમાં ભારત સરકાર દ્વારા આયાત જકાતમાં કરવામાં આવેલા વધારા અને રૂપિયાના ઘસારાને કારણે સ્થાનિક બજારમાં સોનાના ભાવ વાર્ષિક ધોરણે 59% જેટલા ઊંચા રહ્યા છે.
વર્ષ 2026 ના પ્રથમ છ મહિનામાં ભારતની કુલ સોનાની માંગ 1.8% ઘટીને 281.5 ટન રહી હતી, પરંતુ ભાવ વધારાના કારણે તેનું કુલ મૂલ્ય 60% જેટલું ઉછળીને $45.8 અબજ નોંધાયું હતું. આ ગાળા દરમિયાન ગોલ્ડ ETF માં રોકાણ મૂલ્યની દ્રષ્ટિએ 330% વધીને $3.9 અબજ સુધી પહોંચી ગયું હતું, જે દર્શાવે છે કે ઊંચા ભાવ હોવા છતાં ભારતીય રોકાણકારો સોના પર પસંદગી ઉતારી રહ્યા છે.
જોકે, આયાત જકાતમાં કરાયેલા વધારાની એક નકારાત્મક અસર પણ સામે આવી રહી છે. ચાલુ વર્ષના પ્રથમ ત્રિમાસિક ગાળામાં ભારતમાં 196 ટન સોનાની આયાત થઈ હતી, જે બીજા ત્રિમાસિક ગાળામાં કસ્ટમ ડ્યુટી વધ્યા બાદ 23% ઘટીને 98.1 ટન પર આવી ગઈ હતી.
સત્તાવાર આયાતમાં થયેલા આ ઘટાડાની સામે ગ્રે માર્કેટ અને સ્મગલિંગ સિન્ડિકેટ ફરી સક્રિય બની ગયા છે. અગાઉના વર્ષોમાં સતત ઘટીને 20.4 ટન સુધી આવી ગયેલું સોનાનું બિનઅધિકૃત સ્મગલિંગ ચાલુ વર્ષે વધીને 100 ટન સુધી પહોંચવાની આશંકા વ્યક્ત કરવામાં આવી છે. અતિશય ઊંચી કસ્ટમ ડ્યુટીને કારણે હવાલા નેટવર્ક અને સમાંતર અર્થતંત્રને બળ મળી રહ્યું છે, જે સંગઠિત જ્વેલરી વેપાર માટે ચિંતાનો વિષય બન્યો છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
