બોનહામ્સ લંડન હરાજી : ડેવિડ મોરિસનો પર્લ અને ડાયમંડ નેકલેસ કરોડોમાં વેચાયો

DIAMOND CITY NEWS, SURAT

વિશ્વપ્રસિદ્ધ ઓક્શન હાઉસ ‘બોનહામ્સ’ (Bonhams) દ્વારા લંડન ખાતે યોજાયેલી તાજેતરની “Fine Jewellery” હરાજીમાં બ્રિટિશ લક્ઝરી જ્વેલર ડેવિડ મોરિસ (David Morris) દ્વારા ડિઝાઈન કરાયેલો એક અદભુત પર્લ (મોતી) અને ડાયમંડ નેકલેસ આકર્ષણનું મુખ્ય કેન્દ્ર બન્યો હતો.

8 જુલાઈના રોજ યોજાયેલી આ પ્રતિષ્ઠિત હરાજીમાં આ નેકલેસે તેની અંદાજિત કિંમતને પાછળ છોડીને GBP 40,960 (આશરે $54,894 અથવા ₹45 લાખથી વધુ) ની માતબર કિંમત મેળવી નવો રેકોર્ડ બનાવ્યો છે.

આ કિંમતી હારની બનાવટ અત્યંત આકર્ષક અને કલાત્મક છે. તેમાં કલ્ચર્ડ પર્લ્સ (સંવર્ધિત મોતી) ની ત્રણ ભવ્ય હારો સેટ કરવામાં આવી છે, જેની વચ્ચે હીરાજડિત રોન્ડેલ સ્પેસર્સ મૂકવામાં આવ્યા છે.

આ નેકલેસની ખરી સુંદરતા તેના પર પાવે-સેટ (Pavé-set) સિંગલ-કટ પદ્ધતિથી જડેલા હીરાના ફૂલો અને એકબીજામાં પરોવાયેલી કડીઓ (Interlocking hoops) માં છુપાયેલી છે. આ આખા નેકલેસમાં જડેલા હીરાનું કુલ વજન આશરે 22.25 કેરેટ થાય છે.

બોનહામ્સના જણાવ્યા અનુસાર, હરાજી પૂર્વે આ લોટની મહત્તમ કિંમત GBP 35,000 આંકવામાં આવી હતી, પરંતુ ખરીદદારો વચ્ચે જામી ગયેલી ભારે હરીફાઈને કારણે આ નેકલેસે અંદાજ કરતાં ઘણો ઊંચો ભાવ મેળવ્યો હતો.

વૈશ્વિક બ્રાન્ડ્સ પર ધનવંતોની મહેરબાની: અંદાજ કરતાં ચાર ગણી કિંમત મળી

આ હરાજીની સૌથી મોટી વિશેષતા એ રહી કે વેચાણ માટે મૂકવામાં આવેલા ટોપ-10 સર્વોત્તમ દાગીનાઓએ તેમની હરાજી પૂર્વેની નિર્ધારિત ઊંચી કિંમતો (High estimates) ને નોંધપાત્ર માર્જિનથી પાર કરી લીધી હતી.

વૈશ્વિક સ્તરે ડાયમંડ માર્કેટમાં પ્રવર્તતા વિન્ટેજ અને એન્ટિક ઘરેણાંના ક્રેઝને કારણે વિશ્વવિખ્યાત ડિઝાઇનર્સ જેવા કે કાર્ટિયર (Cartier), વેન ક્લીફ એન્ડ આર્પેલ્સ (Van Cleef & Arpels), અને ટિફની એન્ડ કો. (Tiffany & Co.) ના કલેક્શનને તુરંત જ ખરીદદારો મળી ગયા હતા.

હરાજીમાં અન્ય આકર્ષક લોટ્સની વાત કરીએ તો:

• નેચરલ પર્લ નેકલેસ : હીરાના આકર્ષક ક્લાસ્પ (આંકડી) ધરાવતા એક કુદરતી મોતીના હારે બજારને ચોંકાવી દીધું હતું. આ નેકલેસ GBP 39,680 ($53,179) માં વેચાયો હતો, જે તેની અંદાજિત કિંમત કરતાં આશરે ચાર ગણી વધુ કિંમત છે.
• 1930નો વિન્ટેજ બ્રેસલેટ : 1930ના દાયકાનું એક ક્લાસિક ડાયમંડ સ્ટ્રેપ બ્રેસલેટ, જેમાં ચારેય તરફ હીરા જડવામાં આવ્યા હતા, તે GBP 20,000 ની ધારણા સામે GBP 38,400 ($51,463) માં અંડર ધ હેમર (વેચાયું) ગયું હતું.
• ડાયમંડ ફ્રિન્જ નેકલેસ : આશરે 54.10 કેરેટના જંગી હીરા ધરાવતો એક શાનદાર ફ્રિન્જ નેકલેસ GBP 25,000 ના અંદાજની સામે GBP 38,400 ($51,437) માં વેચાયો હતો.
• થ્રી-સ્ટોન ડાયમંડ રિંગ : ત્રણ કિંમતી હીરા જડેલી એક આકર્ષક વીંટીએ તો તમામ રેકોર્ડ તોડી નાખ્યા હતા. માત્ર GBP 10,000 ની અપર પ્રાઇઝ ધરાવતી આ વીંટી GBP 35,840 ($48,032) માં વેચાઈ હતી, જે તેની અંદાજિત કિંમત કરતાં સાડા ત્રણ ગણી વધારે છે.

લંડનની આ હરાજી દર્શાવે છે કે આંતરરાષ્ટ્રીય સ્તરે આર્થિક અસ્થિરતા વચ્ચે પણ હાઈ-એન્ડ જ્વેલરી, દુર્લભ મોતી અને હેરિટેજ બ્રાન્ડ્સના કલેક્શન માટે શ્રીમંત રોકાણકારો અને કલેક્ટર્સમાં ભારે ક્રેઝ જોવા મળી રહ્યો છે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube