ઓકાવાંગો ડાયમંડ કંપનીના મેનેજિંગ ડિરેક્ટર મ્મેટલા મસિરેનું રાજીનામું આપ્યું

DIAMOND CITY NEWS, SURAT

બોત્સ્વાનાની સરકારી માલિકીની રફ હીરા વેચાણ કંપની ઓકાવાંગો ડાયમંડ કંપની (ODC)ના મેનેજિંગ ડિરેક્ટર મ્મેટલા મસિરે 1 ડિસેમ્બર, 2025થી પદ છોડી રહ્યા છે. તેમની જગ્યાએ કંપનીના ચીફ ફાઇનાન્શિયલ ઓફિસર લિપાલેસા મેકેપે અસ્થાયી મેનેજિંગ ડિરેક્ટર તરીકે જવાબદારી સંભાળશે.

મસિરેએ 2021થી ODCનું નેતૃત્વ સંભાળ્યું હતું અને કંપનીની ટર્નઅરાઉન્ડ વ્યૂહરચનાને સફળતાપૂર્વક અમલમાં મૂકી હતી. તેમના કાર્યકાળ દરમિયાન 2022-23ના નાણાકીય વર્ષમાં ODCએ 2012માં સ્થપાયેલી ત્યારથી સર્વકાલીન ઊંચી આવક હાંસલ કરી હતી.

કંપનીએ લિંક્ડઇન પર જાહેર કરેલા નિવેદનમાં જણાવ્યું કે, મસિરેએ સંગઠનાત્મક માળખામાં સુધારો કર્યો, વેચાણ ચેનલોમાં વૈવિધ્યતા લાવી અને બોત્સ્વાનાના હીરા ઉદ્યોગને વિશ્વસ્તરે મજબૂત સ્થાન અપાવવામાં મહત્વપૂર્ણ ભૂમિકા ભજવી. આ બાબતે કંપનીએ જણાવ્યું કે, “શ્રી મસિરે ODCને અત્યંત મજબૂત સ્થિતિમાં છોડીને જઈ રહ્યા છે અને ટીમની ક્ષમતા પર પૂરો વિશ્વાસ વ્યક્ત કર્યો છે કે તે આ ગતિને જાળવી રાખશે.” 

ODCની સ્થાપના 2012માં બોત્સ્વાના સરકાર દ્વારા ડીબીયર્સ સાથેના 50 વર્ષ જૂના વેચાણ કરારમાંથી મુક્ત થઈને દેશના હીરા ઉત્પાદનનો 25% (હવે વધીને 30% સુધી) ભાગ સ્થાનિક બજારમાં વેચવા માટે કરવામાં આવી હતી.

આજે ODC વિશ્વની સૌથી પારદર્શક અને નૈતિક રફ હીરા વેચાણ કંપનીઓમાંની એક ગણાય છે અને દર મહિને ઓનલાઈન ઓક્શન દ્વારા ડીબીયર્સના ડીટીસી બોત્સ્વાના તરફથી મળતા રન-ઓફ-માઈન હીરાનું વેચાણ કરે છે. 2024માં કંપનીએ 10% હિસ્સો ડીબીયર્સને પાછો વેચ્યો હતો, જેનાથી બોત્સ્વાના સરકારનો હિસ્સો 85% અને બાકીનો 5% અન્ય શેરહોલ્ડર્સ પાસે રહ્યો.

લિપાલેસા મેકેપે, જે હાલ CFO છે, સંક્રમણ કાળ દરમિયાન કંપનીનું સંચાલન સંભાળશે અને કાર્યરત સ્થિરતા જાળવશે. ODCએ સ્પષ્ટ કર્યું કે, આ ફેરફાર કંપનીની વ્યૂહાત્મક દિશા કે કામગીરી પર કોઈ અસર કરશે નહીં.

બોત્સ્વાના વિશ્વનો સૌથી મોટો હીરા ઉત્પાદક દેશ છે અને ODC તેના આર્થિક વિકાસમાં મહત્વપૂર્ણ ભૂમિકા ભજવે છે. 2023માં કંપનીએ 700 મિલિયન ડોલરથી વધુનું વેચાણ કર્યું હતું, જેમાંથી મોટો હિસ્સો રાષ્ટ્રીય ખજાનામાં જમા થાય છે. મસિરેના નેતૃત્વ હેઠળ ODCએ પોતાની ડિજિટલ ઓક્શન પ્લેટફોર્મને વધુ મજબૂત કરી અને નવા આંતરરાષ્ટ્રીય ખરીદદારોને આકર્ષ્યા હતા.

આ ફેરફાર એવા સમયે થઈ રહ્યો છે જ્યારે વૈશ્વિક કુદરતી હીરા બજાર પડકારોનો સામનો કરી રહ્યું છે, પરંતુ બોત્સ્વાના સરકારે 2024માં ડીબીયર્સ સાથે નવો 10 વર્ષનો વેચાણ કરાર કરીને દેશના હીરા ઉદ્યોગની લાંબા ગાળાની સ્થિરતા સુનિશ્ચિત કરી છે. ODCના અધિકારીઓએ જણાવ્યું કે, આ ફેરફાર કંપનીની વૃદ્ધિની યાત્રાને કોઈપણ રીતે અસર કરશે નહીં.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube