ભારત-અમેરિકા વેપાર વાટાઘાટોથી હીરા ઉદ્યોગમાં નવી આશા

DIAMOND CITY NEWS, SURAT

ભારત અને અમેરિકા (US) વચ્ચેના દ્વિપક્ષીય આર્થિક સંબંધોને વધુ મજબૂત કરવા અને લાંબા સમયથી પ્રસ્તાવિત વેપાર કરારને આખરી ઓપ આપવા માટે નવી દિલ્હીમાં એક મહત્વપૂર્ણ બેઠક યોજાઈ હતી.

૨૩-૨૪ જૂન ૨૦૨૬ ના રોજ કેન્દ્રીય વાણિજ્ય અને ઉદ્યોગ મંત્રી શ્રી પીયૂષ ગોયલ અને યુએસ ટ્રેડ રિપ્રેઝન્ટેટિવ (USTR) ના એમ્બેસેડર મિસ્ટર જેમીસન ગ્રીઅર (Jamieson Greer) ના નેતૃત્વમાં આવેલા ઉચ્ચ સ્તરીય પ્રતિનિધિમંડળ વચ્ચે દ્વિપક્ષીય બેઠક યોજાઈ હતી. આ વાટાઘાટોમાં બંને દેશો વચ્ચેના પ્રસ્તાવિત વચગાળાના વેપાર કરાર (Interim Trade Agreement) ની પ્રગતિની સમીક્ષા કરવામાં આવી હતી, જેનાથી બંને દેશો વચ્ચેના વેપારને નવી ગતિ મળી છે.

આ હાઈ-પ્રોફાઈલ મિટિંગ પર ભારતની સાથે-સાથે ખાસ કરીને સુરત અને મુંબઈના જેમ એન્ડ જ્વેલરી (હીરા-ઝવેરાત) ઉદ્યોગની નજર મંડાયેલી છે. સમગ્ર ઉદ્યોગ જગત આ વચગાળાના વેપાર કરારની આતુરતાથી રાહ જોઈ રહ્યું છે, કારણ કે આ કરાર લાગુ થતાં જ અમેરિકા જેવા વિશાળ વૈશ્વિક બજારમાં ભારતીય નિકાસકારો માટે વેપારના નવા દ્વાર ખુલશે અને ટેક્સના નિયમો સરળ બનશે.

એનેક્સચર-III હેઠળ મળશે મોટી રાહત : શું છે ગણિત?

ચાલુ વર્ષના ફેબ્રુઆરી મહિનામાં જાહેર કરાયેલા વચગાળાના કરારના માળખા (ફ્રેમવર્ક) અનુસાર, આ ડીલ સત્તાવાર રીતે લાગુ થતાંની સાથે જ ભારતના નેચરલ કટ એન્ડ પોલિશ્ડ ડાયમંડ્સ (કુદરતી હીરા) અને કલર જેમસ્ટોન્સ (રંગબેરંગી રત્નો) ને કરારના ‘એનેક્સ-૩‘ (Annex III) હેઠળ અમેરિકામાં ઝીરો-ડ્યુટી (શૂન્ય કસ્ટમ ડ્યુટી) સાથે પ્રવેશ મળશે. હાલમાં અમેરિકા ભારતીય હીરા પર ઈમ્પોર્ટ ડ્યુટી વસૂલે છે, જે શૂન્ય થવાથી અમેરિકન માર્કેટમાં ભારતીય હીરા સસ્તા અને વધુ સ્પર્ધાત્મક બનશે.

અમેરિકા એ ભારતીય હીરા અને જ્વેલરી માટેનું સૌથી મોટું કન્ઝ્યુમર માર્કેટ છે. ભારતથી નિકાસ થતા કુલ હીરા-ઝવેરાતનો મોટો હિસ્સો સીધો અમેરિકા જાય છે. આવી સ્થિતિમાં કસ્ટમ ડ્યુટી નાબૂદ થવાથી સુરતના ડાયમંડ મેન્યુફેક્ચરિંગ સેક્ટરને સીધો અને બૂસ્ટર ફાયદો મળશે.

લેબ-ગ્રોન ડાયમંડ (LGD) ને પણ કરારમાં સામેલ કરવા માંગ

બીજી તરફ, જેમ એન્ડ જ્વેલરી એક્સપોર્ટ પ્રમોશન કાઉન્સિલ (GJEPC) એ ભારત સરકારને આ વાટાઘાટોમાં એક વિશેષ વિનંતી સબમિટ કરી છે. કાઉન્સિલે આગ્રહ કર્યો છે કે નેચરલ ડાયમંડની જેમ જ ભારતમાં ઝડપથી વિકસી રહેલા લેબ-ગ્રોન ડાયમંડ્સ અને સિન્થેટિક જેમસ્ટોન્સને પણ એનેક્સ-૩ (Annex III) ની ડ્યુટી મુક્તિની યાદીમાં સામેલ કરવામાં આવે. જો ભારત સરકાર અમેરિકાને આ બાબતે મનાવવામાં સફળ રહેશે, તો સુરતના અબજો રૂપિયાના લેબ-ગ્રોન ડાયમંડ ઉદ્યોગ માટે આ એક ઐતિહાસિક ટર્નિંગ પોઇન્ટ સાબિત થશે.

નવી દિલ્હીમાં યોજાયેલી આ તાજેતરની બેઠક દર્શાવે છે કે બંને દેશો આ વચગાળાના કરારને જલ્દીથી અંતિમ સ્વરૂપ આપવા માટે ગંભીર છે. હીરા ઉદ્યોગના અગ્રણીઓ માને છે કે જો બધું આયોજન મુજબ ચાલશે, તો ખૂબ જ ટૂંકા સમયમાં આ મંજૂરી મળી શકે છે, જે વૈશ્વિક મંદીનો સામનો કરી રહેલા ભારતીય હીરા બજારને નવી ઉર્જા આપશે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube