DIAMOND CITY NEWS, SURAT
ભારતે આજે વૈશ્વિક જેમ્સ એન્ડ જ્વેલરી વેપારના કેન્દ્ર તરીકે પોતાની સ્થિતિ ફરી એકવાર મજબૂત કરી છે. જેમ એન્ડ જ્વેલરી એક્સપોર્ટ પ્રમોશન કાઉન્સિલ (GJEPC) દ્વારા મુંબઈના જીઓ વર્લ્ડ કન્વેન્શન સેન્ટર (JWCC) ખાતે IIJS ભારત – સિગ્નેચર 2026ની 18મી આવૃતિ નું ઉદઘાટન કરવામાં આવ્યું હતું. આ સાથે જ વર્ષ 2026 માટે વૈશ્વિક જ્વેલરી બિઝનેસ કેલેન્ડરની વિધિવત શરૂઆત થઈ ગઈ છે.
વર્ષના પ્રથમ અને સૌથી પ્રભાવશાળી B2B ટ્રેડ ફેર તરીકે ઓળખાતા આ પ્રદર્શનમાં સમગ્ર વિશ્વની વેલ્યુ ચેઈન એકસાથે જોવા મળી રહી છે. આ એવો સમય છે જ્યારે આગામી વર્ષ માટે બજારની માનસિકતા અને વ્યાપારી દિશા નક્કી થાય છે.
ભવ્ય આયોજન
મુંબઈના બે પ્રીમિયર સ્થળો—જીઓ વર્લ્ડ કન્વેન્શન સેન્ટર (8–11 જાન્યુઆરી) અને બોમ્બે એક્ઝિબિશન સેન્ટર, નેસ્કો (9–12 જાન્યુઆરી)—ખાતે યોજાયેલ આ પ્રદર્શન 1.25 લાખ ચોરસ મીટરમાં ફેલાયેલું છે. જેમાં :
- 1,600+ પ્રદર્શનકારો અને 3,300+ સ્ટોલ્સ.
- 25,000+ વેપારી ખરીદદારો, જેમાં 40 દેશોના 1,400 આંતરરાષ્ટ્રીય ખરીદદારો અને 12 આંતરરાષ્ટ્રીય પ્રતિનિધિ મંડળોનો સમાવેશ થાય છે.
- સોના, હીરા, ચાંદી, જડતર જ્વેલરી, નેચરલ ડાયમંડ્સ, કલર જેમસ્ટોન્સ, લેબ-ગ્રોન ડાયમંડ્સ અને આધુનિક મશીનરીનું ભવ્ય પ્રદર્શન.
મહાનુભાવોના પ્રેરક ઉદબોધનો
ઉદઘાટન સમારોહના મુખ્ય અતિથિ સેન્ડ્રિન કોન્સેલિયર (CEO, ડી બીયર્સ બ્રાન્ડ્સ) એ જણાવ્યું હતું કે, “જ્વેલરીના ભવિષ્ય વિશે વાત કરવા માટે ભારતથી શ્રેષ્ઠ કોઈ સ્થાન નથી. હીરાની વિશ્વકથાના જન્મસ્થળથી લઈને આજે સૌથી ઝડપથી વિકસતા બજાર સુધી, ભારત વૈશ્વિક ઉદ્યોગ માટે તક અને સ્થિરતાનો સ્તંભ છે. IIJS સિગ્નેચર જેવા પ્લેટફોર્મ આખા ઇકોસિસ્ટમમાં વિશ્વાસ અને ભાગીદારીને મજબૂત બનાવે છે.”
GJEPCના ચેરમેન કિરીટ ભણસાલીએ ભારપૂર્વક કહ્યું કે, “વર્ષ 2026માં ભારત ત્રીજી વખત કિંબર્લી પ્રોસેસનું અધ્યક્ષપદ સંભાળી રહ્યું છે, જે આપણી નૈતિકતા અને વિશ્વસનીયતા પરનો વૈશ્વિક ભરોસો છે. અમે 2047 સુધીમાં 100 બિલિયન ડોલરના નિકાસ લક્ષ્યાંક તરફ આગળ વધી રહ્યા છીએ. FTAs, મજબૂત સરકારી ટેકો અને ટેકનોલોજીકલ ઇનોવેશનના સહારે ભારતીય જ્વેલરી સેક્ટર હવે આંતરરાષ્ટ્રીય બજારમાં નવી ઊંચાઈઓ સર કરશે.”
એક્ઝિમ બેંકના એમડી હર્ષ બંગારીએ ઉમેર્યું કે, “જેમ્સ અને જ્વેલરી ઉદ્યોગ રોજગાર અને નિકાસમાં મહત્વનો ફાળો આપે છે. ઇન્ફ્રાસ્ટ્રક્ચર મજબૂત કરવું અને નાણાકીય ઉત્પાદનો પ્રત્યે જાગૃતિ લાવવી એ આ સેક્ટરની સંપૂર્ણ ક્ષમતાને બહાર લાવવા માટે અનિવાર્ય છે.”
કેરેટલેનના એમડી સૌમેન ભૌમિકે કારીગરો પર ભાર મૂકતા કહ્યું, “કારીગરોને પ્રાથમિકતા આપવી એ કોઈ દાન નથી પણ વ્યાપારી સમજદારી છે. જો આપણે વૈશ્વિક નેતા બનવું હોય, તો આપણા કલાકારોની ગરિમા અને સુરક્ષા વિકાસના કેન્દ્રમાં હોવા જોઈએ.”
સાંસ્કૃતિક વિરાસત અને આધુનિકતાનું સંગમ
‘બ્રિલિયન્ટ ભારત’ થીમ હેઠળ અહીં એક વિશેષ ક્રાફ્ટ્સ પેવેલિયન બનાવવામાં આવ્યું છે, જે ભારતની ભવ્ય કલાને જીવંત કરે છે. અહીં નેશનલ એવોર્ડ વિજેતા કારીગરો દ્વારા થેવા (કાચ પર સોનું), બનારસી મીનાકારી, કટકની સિલ્વર ફિલીગ્રી અને હુપરી ક્લસ્ટરની ચાંદીની કળાનું જીવંત પ્રદર્શન કરવામાં આવ્યું છે.
સાથે જ, Select CLUB નામના લક્ઝરી સેગમેન્ટમાં 107 પસંદગીની કંપનીઓ દ્વારા હાઈ-એન્ડ કૌટુર જ્વેલરી રજૂ કરવામાં આવી છે. આ ઉપરાંત, ‘Innov8 Talks’ દ્વારા FTA અને 2030 સુધીમાં જ્વેલરીમાં AI ની ભૂમિકા જેવા વિષયો પર જ્ઞાનનું આદાન-પ્રદાન કરવામાં આવશે.
પર્યાવરણ પ્રત્યેની જવાબદારી નિભાવતા GJEPC એ આ પ્રદર્શનમાં 6 લાખથી વધુ સિંગલ-યુઝ પ્લાસ્ટિક બોટલોનો ઉપયોગ ટાળીને ટકાઉ વિકાસ (Sustainability) તરફ મોટું ડગલું માંડ્યું છે.
IIJS ભારત – સિગ્નેચર 2026 એ માત્ર એક વ્યાપારી પ્રદર્શન નથી, પરંતુ તે ભારતીય વિરાસત, નવીનતા અને વૈશ્વિક વ્યાપારી તકોનું એક સંગમ સ્થાન છે જે આગામી વર્ષ માટે સમગ્ર ઉદ્યોગની દિશા નક્કી કરશે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
