DIAMOND CITY NEWS, SURAT
વૈશ્વિક હીરા ઉદ્યોગમાં ચાલી રહેલી લાંબા ગાળાની મંદી અને યુક્રેન યુદ્ધ બાદ રશિયન હીરા પર પશ્ચિમી દેશો દ્વારા લાદવામાં આવેલા આંતરરાષ્ટ્રીય પ્રતિબંધોની સીધી અસર રશિયાની સરકારી ડાયમંડ માઇનિંગ કંપની અલરોસા (Alrosa) ના નાણાકીય પ્રદર્શન પર પડી છે. ચાલુ વર્ષ ૨૦૨૬ ના પ્રથમ છ મહિનામાં (H1 2026) કંપની નફામાંથી સીધી મોટા નાણાકીય નુકસાન (Red) માં સરેડી પડી છે.
નાણાકીય પરિણામો અને ખોટનો આંકડો :
૩૦ જૂન ૨૦૨૬ ના રોજ પૂરા થયેલા પ્રથમ છ મહિનાના રિપોર્ટ અનુસાર, અલરોસાને ૧૦.૬૭ બિલિયન રશિયન રૂબલ ($૧૨૯.૭ મિલિયન્સ – આશરે ₹૧,૦૭૬ કરોડ) ની ચોખ્ખી ખોટ નોંધાઈ છે. નોંધનીય છે કે અગાઉના વર્ષ ૨૦૨૫ ના સમાન ગાળામાં કંપનીએ ૩૯.૦૩ બિલિયન રૂબલ ($૪૭૪.૫૨ મિલિયન્સ – આશરે ₹૩,૯૩૫ કરોડ) નો જંગી ચોખ્ખો નફો કર્યો હતો.
કંપનીની કુલ આવક વાર્ષિક ધોરણે ૩૬% ઘટીને ૭૪.૧૬ બિલિયન રૂબલ ($૯૦૧.૬ મિલિયન્સ – આશરે ₹૭,૪૭૬ કરોડ) રહી છે. અલરોસાએ આવકમાં ઘટાડાનું કોઈ એક ચોક્કસ કારણ સ્પષ્ટ કર્યું નથી, પરંતુ ભૌગોલિક-રાષ્ટ્રીય (Geopolitical) અને મેક્રોઇકોનોમિક અસ્થિરતા, પશ્ચિમી દેશોના પ્રતિબંધો, સોનાના વધતા ભાવ, જ્વેલરી ખરીદીની પેટર્નમાં ફેરફાર તેમજ કાચા (Rough) અને પોલિશ્ડ હીરાની સુસ્ત માગને રશિયન ડાયમંડ માર્કેટને અસર કરતા મુખ્ય પરિબળો ગણાવ્યા છે.
પશ્ચિમી પ્રતિબંધો અને રશિયન સપ્લાય :
ફેબ્રુઆરી ૨૦૨૨ માં યુક્રેન યુદ્ધ શરૂ થયા બાદ અમેરિકા અને અન્ય પશ્ચિમી દેશોએ રશિયન હીરાના વેપાર પર કડક સિંડિકેટ પ્રતિબંધો લાદ્યા હતા. જોકે, રશિયન કાચો માલ વિવિધ માર્ગો દ્વારા વૈશ્વિક બજારમાં પહોંચી રહ્યો છે, પરંતુ આંતરરાષ્ટ્રીય દબાણને કારણે અલરોસાએ હવે દેશવાર વેચાણના આંકડા જાહેર કરવાનું બંધ કરી દીધું છે.
૧ સપ્ટેમ્બરથી ૮% નિકાસ ટેક્સની માર :
ડાયમંડ માર્કેટની નબળાઈ વચ્ચે રશિયન સરકારે સ્થાનિક રેવેન્યુ વધારવા માટે ૧ સપ્ટેમ્બર ૨૦૨૬ થી ૦.૪૫ કેરેટથી વધુ વજન ધરાવતા અનપ્રોસેસ્ડ રફ ડાયમંડ (જેમાં ૧૦.૮ કેરેટથી મોટા સ્પેશિયલ-સાઇઝના હીરા પણ સામેલ છે) પર ૮% એક્સપોર્ટ ડ્યૂટી (નિકાસ કર) લાદવાની જાહેરાત કરી છે. અલરોસાના અંદાજ મુજબ, આ નવા ટેક્સના કારણે કંપનીના નફા પર વધુ ૩.૧૨ બિલિયન રૂબલ ($૩૭.૯ મિલિયન્સ – આશરે ₹૩૧૪ કરોડ) નો બોજ પડશે.
ભવિષ્યનો દ્રષ્ટિકોણ અને માગમાં રિકવરીની આશા :
આ તમામ પડકારો વચ્ચે પણ અલરોસા ડાયમંડ જ્વેલરીની વૈશ્વિક માગમાં રિકવરી અંગે આશાવાદી છે. કંપનીએ આગાહી કરી છે કે આગામી વર્ષ ૨૦૨૭ સુધીમાં ડાયમંડ જ્વેલરીની માગ ૨૦૨૨ ના સ્તર પર પરત ફરી શકે છે. આ સાથે જ કંપની આગામી સમયમાં હીરાની કિંમતોમાં વાર્ષિક ૨% ના દરે ક્રમિક વૃદ્ધિ થવાની શક્યતા પણ વ્યક્ત કરી રહી છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
