Home EVENT સિંગાપોરમાં વર્લ્ડ ડાયમંડ કોંગ્રેસનો પ્રારંભ : હીરા ઉદ્યોગના ભવિષ્ય માટે નિર્ણાયક સાબિત...

સિંગાપોરમાં વર્લ્ડ ડાયમંડ કોંગ્રેસનો પ્રારંભ : હીરા ઉદ્યોગના ભવિષ્ય માટે નિર્ણાયક સાબિત થશે

જી૭ પ્રતિબંધો, લેબ-ગ્રોનનો પડકાર, ડી બિયર્સની નવી વ્યૂહરચના અને ભારત-ચીન-દુબઈ વચ્ચે પ્રમુખ પદ માટે ખરાખરીનો જંગ.

July 12, 2026

- Advertisement -

DIAMOND CITY NEWS, SURAT

વૈશ્વિક હીરા ઉદ્યોગના ઈતિહાસમાં કદાચ સૌથી વધુ પ્રવાહી અને પડકારજનક ગણાતા સમયગાળા વચ્ચે આજથી એટલે કે ૧૨ થી ૧૫ જુલાઈ ૨૦૨૬ દરમિયાન સિંગાપોર ખાતે ૪૧મી વર્લ્ડ ડાયમંડ કોંગ્રેસ (41st World Diamond Congress) નો ભવ્ય પ્રારંભ થઈ રહ્યો છે.

‘વર્લ્ડ ફેડરેશન ઓફ ડાયમંડ બોર્સીસ’ (WFDB) અને ‘આંતરરાષ્ટ્રીય ડાયમંડ મેન્યુફેક્ચરર્સ એસોસિએશન’ (IDMA) દ્વારા સંયુક્ત રીતે આયોજિત આ ચાર દિવસીય વૈશ્વિક મહાસભામાં વિશ્વના ૨૬ થી વધુ દેશોના ડાયમંડ એક્સચેન્જના વડાઓ, માઇનિંગ જાયન્ટ્સ, બેન્કર્સ, પોલિસી મેકર્સ અને જ્વેલરી સેક્ટરના અગ્રણીઓ એક મંચ પર એકઠા થઈ રહ્યા છે.

વર્ષ ૧૯૪૭ માં સ્થાપના થયા બાદ, દર ત્રણ વર્ષે યોજાતી આ કોંગ્રેસ આ વખતે માત્ર ઔપચારિક બેઠક નથી, પરંતુ વૈશ્વિક હીરા ઉદ્યોગની અસ્તિત્વ રક્ષા અને આગામી દાયકાના રોડમેપ માટેનું સર્વોચ્ચ ચિંતન શિબિર બની રહેશે.

આફ્રિકન માઇનિંગ સત્તાધીશો અને વૈશ્વિક નેતાઓનું હાઇ-લેવલ ડેપ્યુટેશન

સિંગાપોર કોંગ્રેસના ઉદ્ઘાટન સત્રમાં આફ્રિકન ખંડના હીરા ઉત્પાદક દેશોના ઉચ્ચ સ્તરીય પ્રતિનિધિમંડળની હાજરી વૈશ્વિક સપ્લાય ચેઇનની પુનઃરચના તરફ સંકેત કરે છે.

બોત્સ્વાનાના ખનિજ અને ઊર્જા મંત્રી હોન. બોગોલો જોય કેનેવેન્ડો (Hon. Bogolo Joy Kenewendo) આ સમિટમાં મુખ્ય વક્તા તરીકે હાજર રહેશે. બોત્સ્વાના હાલમાં રફ હીરાના મૂલ્યની દ્રષ્ટિએ વિશ્વનો સૌથી મોટો દેશ છે અને ડી બિયર્સ સાથેના તેના નવા કરાર બાદ વૈશ્વિક બજારમાં તેનું વર્ચસ્વ વધ્યું છે.
અંગોલા પ્રજાસત્તાકના ખનિજ સંસાધનોના રાજ્ય મંત્રી એચ.ઇ. ડો. જેનિયો દા રોઝા કોરિયા વિક્ટર (H.E. Dr Janio da Rosa Correa Victor) પણ ખાસ ઉપસ્થિત રહેશે. અંગોલા પોતાનું રફ પ્રોડક્શન સતત વધારી રહ્યું છે અને તાજેતરમાં જ તેણે WFDB માં “નેશન એફિલિએટેડ” મેમ્બર તરીકે સ્થાન મેળવ્યું છે.
તેમની સાથે કતાર ને WFDB ના કાયમી સભ્ય તરીકે સામેલ કરવા માટે આ કોંગ્રેસમાં સત્તાવાર મતદાન પ્રક્રિયા હાથ ધરવામાં આવશે, જે મિડલ ઈસ્ટમાં નેચરલ ડાયમંડના કન્ઝમ્પશન અને ટ્રેડિંગ માટે નવું હબ ખોલશે.

WFDB ના ઈતિહાસની સૌથી વિવાદાસ્પદ અને રસાકસીભરી ચૂંટણી

WFDB ના ઈતિહાસની આ સૌથી રોમાંચક અને વિવાદાસ્પદ ચૂંટણી પાછળ માત્ર સત્તાની લડાઈ નથી, પરંતુ હીરા ઉદ્યોગના ભવિષ્યને લઈને અલગ-અલગ દેશોની વિચારધારાઓ વચ્ચેનો સીધો મુકાબલો છે.

સામાન્ય રીતે આ સંસ્થામાં દાયકાઓથી સર્વસંમતિથી જ પ્રમુખની બિનહરીફ વરણી કરવાની પરંપરા રહી છે, પરંતુ બદલાતા વૈશ્વિક સમીકરણો વચ્ચે આ વખતે પ્રથમવાર ભારત, દુબઈ (યુએઈ) અને ચીન વચ્ચે ત્રિપાંખીયો જંગ ખેલાઈ રહ્યો છે.

આ ચૂંટણીમાં રસપ્રદ નિયમ એ છે કે દુનિયાના કોઈપણ બોર્સ (ડાયમંડ એક્સચેન્જ) ભલે કદમાં ગમે તેટલા નાના કે મોટા હોય, દરેક પાસે માત્ર ‘૧ વોટ’ નો જ અધિકાર છે, જેના કારણે બહુમતી મેળવવા માટે દરેક દેશોએ આંતરરાષ્ટ્રીય સ્તરે ભારે લોબિંગ શરૂ કર્યું છે.

આ રેસમાં સૌથી મજબૂત દાવેદાર તરીકે ભારતના મેહુલ શાહ (ભારત ડાયમંડ બોર્સ – BDB ના વાઇસ પ્રેસિડેન્ટ) મેદાને છે. તેઓ ઉદ્યોગમાં ૪૬ વર્ષનો બહોળો અનુભવ અને WFDB ના ટ્રેઝરર તરીકે ૧૦ વર્ષનો વહીવટી અનુભવ ધરાવે છે.

તેઓ ‘પરંપરા અને વરિષ્ઠતા’ ના મોડલના સમર્થક છે, જેમાં તેમનું માનવું છે કે યુવાનોને વેપારમાં ચોક્કસ લાવવા જોઈએ પરંતુ સર્વોચ્ચ પદ અનુભવી વરિષ્ઠોના માર્ગદર્શન હેઠળ જ મળવું જોઈએ. તેઓ પોતાને કુદરતી હીરા વેપારી (Diamantaire) તરીકે રજૂ કરી રહ્યા છે અને નેચરલ ડાયમંડના હિતોના રક્ષણની વાત કરી રહ્યા છે.

તેમની સામે સૌથી આક્રમક પડકાર દુબઈથી અહેમદ બિન સુલેયમ (દુબઈ ડાયમંડ એક્સચેન્જ – DDE અને DMCC ના સીઇઓ) આપી રહ્યા છે. તેઓ કિંબર્લી પ્રોસેસના ૩ વખત ચેરમેન રહી ચૂક્યા છે અને ૫૦ વર્ષથી ઓછી ઉંમરના યુવા હીરા વેપારીઓ (Young Diamantaires) નું મોટું સમર્થન ધરાવે છે. સુલેયમ સંસ્થાને વધુ આધુનિક, ડિજિટલ અને આક્રમક બનાવવા માંગે છે. જોકે, દુબઈએ તાજેતરમાં લેબ-ગ્રોન (કૃત્રિમ) હીરાને ખુલ્લું પ્લેટફોર્મ આપ્યું હોવાથી નેચરલ ડાયમંડના જૂના વેપારીઓ તેમનાથી થોડા નારાજ હોવાની ચર્ચા છે.

ત્રીજા ઉમેદવાર તરીકે ચીનના લિન કિઆંગ (શાંઘાઈ ડાયમંડ એક્સચેન્જ – SDE ના વડા) છે, જેઓ પાછલા ૨૬ વર્ષથી શાંઘાઈ બોર્સનું નેતૃત્વ કરી રહ્યા છે. તેઓ વૈશ્વિક બજારમાં સંતુલન અને એકતા લાવવાના એજન્ડા સાથે આગળ વધી રહ્યા છે. આંતરરાષ્ટ્રીય સ્તરે એવી ચર્ચા છે કે યુરોપના પરંપરાગત હબ ગણાતા એન્ટવર્પ (બેલ્જિયમ) ના બોર્સનું આડકતરું સમર્થન ચીન તરફ ઝૂકેલું હોઈ શકે છે. આ ત્રણેય દિગ્ગજો વચ્ચેનો આ મુકાબલો સિંગાપોર કોંગ્રેસમાં વૈશ્વિક હીરા ઉદ્યોગની સત્તાનું નવું કેન્દ્ર નક્કી કરશે.

એજન્ડા ૨૦૨૬ : કોંગ્રેસની બંધ બારણે બેઠકોમાં કયા મુખ્ય મુદ્દાઓ ગાજશે?

આઉટગોઇંગ પ્રેસિડેન્ટ યોરામ દ્વશના જણાવ્યા અનુસાર : “વૈશ્વિક હીરા ઉદ્યોગ હાલમાં એક મોટા પરિવર્તન (Soul-searching) માંથી પસાર થઈ રહ્યો છે. ૨૦ વર્ષ પહેલાં હીરાના વેપાર માટે બોર્સ (Exchange) એક અનિવાર્ય ભૌતિક જરૂરિયાત હતી, પરંતુ ડિજિટલ યુગમાં તેનું મહત્વ ઘટ્યું છે. ઇઝરાયલ ડાયમંડ એક્સચેન્જ (IDE) જેવા જૂના સભ્યોના રાજીનામા અને પુનઃપ્રવેશ જેવી ઘટનાઓ વચ્ચે, આપણે આપણી પ્રાસંગિકતા સાબિત કરવી પડશે.”

૧. જી૭ (G7) પ્રતિબંધો અને રશિયન માલનું ટ્રેકિંગ

યુક્રેન યુદ્ધ બાદ રશિયન માઇનિંગ જાયન્ટ ‘અલરોસા’ (Alrosa) ના રફ હીરા પર જી૭ દેશો દ્વારા લાદવામાં આવેલા પ્રતિબંધો અને બેલ્જિયમના એન્ટવર્પ ખાતે સેન્ટ્રલાઈઝ્ડ વેરિફિકેશન સિસ્ટમ (મુખ્ય સોર્સિંગ હબ) ના આગ્રહને કારણે ભારત અને અમેરિકાના વેપારીઓ વચ્ચે મોટો તણાવ છે. સિંગાપોર કોંગ્રેસમાં ટ્રેસેબિલિટી (Traceability) ટેકનોલોજી અને બ્લોકચેઈન આધારિત સર્ટિફિકેશન સિસ્ટમ પર સર્વસંમતિ સાધવાનો પ્રયાસ કરવામાં આવશે જેથી સુરતના નાના ઉત્પાદકોને મુશ્કેલી ન પડે.

૨. લેબ-ગ્રોન ડાયમંડ (LGD) નો ઘસારો અને પ્રાઇસ ક્રેશ

પાછલા વર્ષોમાં લેબ-ગ્રોન હીરાના કારણે નેચરલ ડાયમંડની કિંમતોમાં જોવા મળેલો મોટો ઘટાડો એ ચર્ચાનો મુખ્ય વિષય છે. દુબઈએ લેબ-ગ્રોન કોન્ફરન્સ યોજીને સિન્થેટિક માલને પ્રોત્સાહન આપ્યું હોવાનો ભારતના ઉમેદવાર મેહુલ શાહે આડકતરો વિરોધ કર્યો છે. કોંગ્રેસમાં નેચરલ ડાયમંડ કાઉન્સિલ (NDC) સાથે મળીને ગ્રાહકોમાં કુદરતી હીરાની ઇમોશનલ વેલ્યુ પુનઃસ્થાપિત કરવા માટે વૈશ્વિક માર્કેટિંગ ફંડ ઊભું કરવા પર ભાર મૂકાશે.

૩. ડી બિયર્સનો ભાવ ઘટાડો અને સાઇટહોલ્ડર કટોકટી

તાજેતરમાં જ જુલાઈ સાઇટમાં ડી બિયર્સ દ્વારા ૦.૭૫ કેરેટથી નાની રફના ભાવમાં જે મોટો ઘટાડો કરાયો છે અને પોતાના જૂના ૭૦ સાઇટહોલ્ડર્સની યાદી ઘટાડીને માત્ર ૪૫ થી ૫૦ કરી દીધી છે, તેનાથી બજારમાં ભારે ગભરાટ છે. એંગ્લો અમેરિકન કંપની દ્વારા ડી બિયર્સને વેચવાની ચાલી રહેલી પ્રક્રિયા વચ્ચે ખાણકામ કંપનીઓનું ભવિષ્ય શું હશે, તેની પણ સમીક્ષા કરવામાં આવશે.

ભારતીય હીરા ઉદ્યોગ (સુરત અને મુંબઈ) માટે આ કોંગ્રેસ શા માટે ‘કરો કે મરો’ સમાન છે?

વિશ્વના ૧૪ માંથી ૧૩ હીરા સુરતના નાના-મોટા કારખાનાઓમાં કટ અને પોલિશ થાય છે. હાલમાં ભારતીય જ્વેલરી ક્ષેત્રે ‘ટાઇટન’ (Titan) ના પ્રથમ ક્વાર્ટરના પરિણામોમાં ૩૯% ની જંગી વૃદ્ધિ અને ઓગસ્ટમાં મુંબઈમાં યોજાનારા IIJS (ઈન્ડિયા ઈન્ટરનેશનલ જ્વેલરી શો) ને કારણે સ્થાનિક બજારમાં તેજીનો અંડરકરન્ટ છે.

પરંતુ, જો જી૭ ના નિયમો વધુ આકરા બને અથવા WFDB નું નેતૃત્વ ભારતના પક્ષમાં ન આવે, તો વૈશ્વિક સ્તરે ભારતીય મેન્યુફેક્ચરિંગ સેક્ટરનો અવાજ દબાઈ જવાની ભીતિ છે. વળી, અમેરિકામાં ઓગસ્ટ મહિનાથી લાગુ થઈ રહેલા ફોર્સ્ડ લેબર સંબંધિત નવા ટેરિફ (આયાત ડ્યુટી) પૂર્વે ભારતીય નિકાસકારો સિંગાપોર મંચ પરથી અમેરિકન પ્રમુખ રિટેલ સંગઠનો સાથે સીધો સંવાદ સાધવા ઈચ્છે છે.

આથી, સિંગાપોરમાં રમાનાર આ ગેમ માત્ર પ્રમુખની ખુરશી માટે નથી, પરંતુ મંદીના માહોલમાંથી વૈશ્વિક હીરા ઉદ્યોગને બહાર કાઢવા અને સુરતના લાખો રત્નકલાકારોના રોજગારને સ્થિરતા આપવા માટેનો સૌથી મોટો ટર્નિંગ પોઇન્ટ સાબિત થવાનો છે. વૈશ્વિક ડાયમંડ જગતની નજર સોમવારે સિંગાપોરમાં પડનારા મતો પર ટકેલી છે.

Disclaimer : This information has been collected through secondary research and Diamond City Newspaper is not responsible for any errors in the same.