આગામી તહેવારોની સિઝનમાં અમેરિકામાં હોલિડે સ્પેન્ડિંગ $૧ ટ્રિલિયન પાર કરશે : બેન એન્ડ કંપની

DIAMOND CITY NEWS, SURAT 

આગામી તહેવારોની સિઝન (Holiday Season) માં અમેરિકા (US) ના ગ્રાહકો દ્વારા કરવામાં આવતા ખર્ચમાં અગાઉના વર્ષોની સરખામણીએ સુધારો જોવા મળશે. કન્સલ્ટિંગ ફર્મ ‘બેન એન્ડ કંપની’ (Bain & Company) ના તાજેતરના સર્વે મુજબ, નવેમ્બરથી ડિસેમ્બર ૨૦૨૬ ના ગાળા દરમિયાન અમેરિકામાં રિટેલ વેચાણ વાર્ષિક ધોરણે ૪.૫% વધીને ઈતિહાસમાં પ્રથમ વખત $૧ ટ્રિલિયન (૧ લાખ કરોડ ડોલર) ના આંકડાને વટાવી જશે. વિતેલા વર્ષ ૨૦૨૫ માં આ વૃદ્ધિદર ૩.૫% નોંધાયો હતો.

રિટેલર્સ માટે ફુગાવો (Inflation) અને અટકેલો પગારવધારો હજુ પણ પડકારજનક છે. રિપોર્ટ અનુસાર, વેચાણમાં થનારા આ નાણાકીય વધારામાં અડધાથી વધુ હિસ્સો મોંઘવારીનો રહેશે. સર્વે દર્શાવે છે કે આ વર્ષે ખાસ કરીને પુરુષો, ઊંચી આવક ધરાવતો વર્ગ અને યુવા ગ્રાહકો વધુ ખર્ચ કરવાની માનસિકતા ધરાવે છે.

મેકકિન્સે અને પીડબલ્યુસી (PwC) નો સર્વે અને જ્વેલરી ક્ષેત્રની સ્થિતિ :

અન્ય વૈશ્વિક સંસ્થા ‘મેકકિન્સે’ (McKinsey) ના સર્વે અનુસાર, ૩૪% ગ્રાહકો આગામી સિઝન માટે આશાવાદી છે, જ્યારે વધતા ભાવ અને ફુગાવો તેમની મુખ્ય ચિંતા છે. જ્વેલરી સેક્ટર અંગે ગ્રાહકોનું વલણ નીચે મુજબ છે :

• જ્વેલરી ખર્ચનો ટ્રેન્ડ : આગામી ત્રણ મહિના માટે ૪૩% ગ્રાહકોએ જ્વેલરી પર ઓછો ખર્ચ કરવાનો પ્લાન બનાવ્યો છે, ૩૯% લોકો અગાઉ જેટલો જ ખર્ચ જાળવી રાખશે, જ્યારે માત્ર ૧૮% ગ્રાહકો જ્વેલરી પર વધુ ખર્ચ કરવા ઈચ્છે છે.
• જેન-ઝી (Gen Z) માં જ્વેલરીનો ક્રેઝ : જુદી જુદી પેઢીઓમાં જ્વેલરી ખરીદવાની ઈચ્છામાં મોટો તફાવત જોવા મળ્યો છે. જેન-ઝી (Gen Z) યુવાનોમાં જ્વેલરી ખરીદવાની સૌથી વધુ ૧૮% ઉત્સુકતા જોવા મળી છે. તેની સરખામણીએ મિલિનિયલ્સ (Millennials) માં ૧૩%, જેન-એક્સ (Gen X) માં ૮% અને બેબી બૂમર્સ (Baby Boomers) માં માત્ર ૫% લોકોએ જ જ્વેલરી ખરીદવાની ઈચ્છા દર્શાવી છે.
• પીડબલ્યુસી (PwC) ૨૦૨૬ આઉટલુક : PwC ના અહેવાલ મુજબ, આ સિઝનમાં ગિફ્ટ ખરીદીમાં ૨% નો ઘટાડો થઈને ગ્રાહક દીઠ સરેરાશ ખર્ચ $૭૦૮ રહેવાનો અંદાજ છે. આશરે ૮૦% ગ્રાહકો બજેટ બનાવીને ખરીદી કરશે, જ્યારે ૭૯% લોકો ડિસ્કાઉન્ટ અને ખાસ ડીલ્સ આધારિત ખરીદી કરવાનો નિર્ણય લેશે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube