DIAMOND CITY NEWS, SURAT
વૈશ્વિક આર્થિક અનિશ્ચિતતાઓ અને વિવિધ પડકારો વચ્ચે પણ અમેરિકા (US) માં કુદરતી હીરા (Natural Diamonds) ની માંગમાં જોરદાર સુધારો જોવા મળ્યો છે.
અગ્રણી ડાયમંડ કંપની ‘ડી બીયર્સ’ (De Beers) ના સંયુક્ત અહેવાલ અનુસાર, ગ્રાહકોમાં કુદરતી હીરા ખરીદવાની ઈચ્છા, આકર્ષણ અને તેના પર થતો સરેરાશ ખર્ચ રેકોર્ડ સ્તરે પહોંચી ગયો છે.
માર્કેટ રિસર્ચ માટે કરવામાં આવેલા ૧૮,૫૦૦ મહિલાઓના એક વ્યાપક સર્વેક્ષણ બાદ એ સ્પષ્ટ થયું છે કે આજે પણ મહિલાઓની પહેલી પસંદ નેચરલ ડાયમંડ જ છે.
આ અહેવાલના સૌથી ચોંકાવનારા અને હકારાત્મક આંકડા ગ્રાહકોના બદલાતા વલણને દર્શાવે છે. અમેરિકામાં કુદરતી હીરા પર થતો સરેરાશ ખર્ચ ૨૫% વધીને $૪,૦૬૩ (અંદાજે ₹૩.૩૫ લાખથી વધુ) પર પહોંચી ગયો છે, જે વર્ષ ૨૦૨૩માં માત્ર $૩,૨૪૨ હતો.
આ સાથે જ લોકો હવે મોટા કદના હીરા પસંદ કરી રહ્યા છે, જેના કારણે ખરીદવામાં આવતા હીરાનું સરેરાશ વજન ૧.૬૫ કેરેટથી વધીને ૧.૮૬ કેરેટ થયું છે. બજારમાં હીરાની પ્રાપ્તિનો દર (Acquisition Rate) પણ વધીને ૯% એ પહોંચ્યો છે.
મિલેનિયલ્સ અને જેન-ઝી (Gen Z) ખરીદીમાં મોખરે
હીરાના વેચાણને વેગ આપવામાં નવી પેઢી સૌથી મોટું ચાલક બળ સાબિત થઈ રહી છે. કુલ કુદરતી હીરાની માંગમાં ૫૫% હિસ્સા સાથે ‘મિલેનિયલ્સ’ (ટ્વેન્ટીઝ અને થર્ટીઝની ઉંમરના યુવાનો) સૌથી મોટા ખરીદદાર રહ્યા છે. જ્યારે ૨૩% હિસ્સા સાથે ‘જેન-ઝી’ (૧૯૯૭ પછી જન્મેલી પેઢી) બીજા ક્રમે આવી ગઈ છે.
રસપ્રદ ફેક્ટ : જેન-ઝી ગ્રાહકો તેમની અગાઉની પેઢી (બેબી બૂમર્સ) કરતાં ખરીદી દીઠ લગભગ બમણો ખર્ચ કરી રહ્યા છે. આ આધુનિક યુવાનો હીરાને માત્ર એક ઘરેણું નહીં, પરંતુ આત્મ-અભિવ્યક્તિ (Self-expression) અને પોતાની વ્યક્તિગત સફળતાની ઉજવણીના પ્રતીક તરીકે જુએ છે.
લગ્ન પ્રથાથી આગળ વધતો ટ્રેન્ડ : ગિફ્ટિંગ અને સેલ્ફ-પર્ચેઝિંગનું ચલણ
અહેવાલમાં જ્વેલરી ઉદ્યોગમાં એક મોટો સામાજિક બદલાવ પણ નોંધાયો છે. અગાઉ હીરાની ખરીદી મુખ્યત્વે લગ્ન કે સગાઈ (Bridal Demand) માટે જ થતી હતી, પરંતુ હવે ચિત્ર બદલાયું છે. કુલ માંગમાં લગ્ન અને સગાઈની જ્વેલરીનો હિસ્સો ઘટીને માત્ર ૨૫% રહી ગયો છે.
તેની સામે અન્ય વ્યક્તિને ભેટ આપવા માટે (Gifting) ૪૪% અને પોતાની જાત માટે ખરીદી કરવા માટે (Self-purchase) ૩૧% હિસ્સો નોંધાયો છે, જે દર્શાવે છે કે ગ્રાહકો હવે કોઈ પ્રસંગની રાહ જોયા વિના હીરા ખરીદી રહ્યા છે.
લેબ-ગ્રોન હીરા સામે કુદરતી હીરાનું વર્ચસ્વ કાયમ
જો કે બજારમાં લેબ-ગ્રોન (કૃત્રિમ) હીરા ખરીદવાનો દર પણ ૯% સુધી પહોંચી ગયો છે, પરંતુ નાણાકીય મૂલ્ય (Value) ની દ્રષ્ટિએ કુદરતી હીરાનો દબદબો અકબંધ છે.
અમેરિકાના સમગ્ર ડાયમંડ માર્કેટમાં વેલ્યુની દ્રષ્ટિએ નેચરલ ડાયમંડનો હિસ્સો ૭૫% છે, જ્યારે સ્વતંત્ર ઝવેરીઓ (Independent Jewelers) ના ત્યાં થતા કુલ વેચાણમાં આ હિસ્સો ૮૫% જેટલો ઊંચો છે.
ડી બીયર્સના જણાવ્યા અનુસાર, લેબ-ગ્રોન હીરાની કિંમતોમાં સતત થઈ રહેલા ઘટાડાને કારણે આગામી સમયમાં રિટેલર્સના પ્રોફિટ માર્જિન પર ભારે દબાણ આવી શકે છે.
ભવિષ્યની વાત કરીએ તો, બજારમાં નેચરલ અને લેબ-ગ્રોન હીરા વચ્ચેનો તફાવત વધુ સ્પષ્ટ કરવો અને મજબૂત માર્કેટિંગ કરવું અનિવાર્ય બનશે. બીજી તરફ, પૃથ્વીના પેટાળમાંથી નીકળતા કુદરતી હીરાનો પુરવઠો સતત ઘટી રહ્યો છે.
ડી બીયર્સના અંદાજ મુજબ, વૈશ્વિક સ્તરે કાચા હીરા (Rough Diamond) નું ઉત્પાદન વર્ષ ૨૦૨૬ના ૧૦૫ મિલિયન કેરેટથી ઘટીને વર્ષ ૨૦૩૦ સુધીમાં માત્ર ૯૬ મિલિયન કેરેટ રહી જશે. આ ઘટતો પુરવઠો આગામી સમયમાં કુદરતી હીરાને વધુ દુર્લભ અને કિંમતી બનાવશે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
