DIAMOND CITY NEWS, SURAT
સુરતના અને અમદાવાદ જ્વેલરી બજારમાં રક્ષાબંધનના પવિત્ર તહેવારને લઈને ગ્રાહકોની ભારે ચહલપહલ જોવા મળી રહી છે. સોના અને ચાંદીના ભાવ અત્યાર સુધીની સર્વોચ્ચ ઐતિહાસિક સપાટી પર હોવા છતાં, બહેનો અને ભાઈઓ તરફથી કિંમતી ધાતુઓની ખરીદીમાં જબરદસ્ત ઉત્સાહ નોંધાયો છે. અમદાવાદના સ્થાનિક વેપારીઓના જણાવ્યા અનુસાર, મોંઘવારીના આ તબક્કામાં ગ્રાહકો હવે સ્માર્ટ ખરીદી તરફ વળ્યા છે અને સિલ્વર રાખડીઓ, ચાંદીના સિક્કા, લાઈટવેઈટ ગોલ્ડ જ્વેલરી તેમજ ઓછા કેરેટ ધરાવતી બનાવટો પસંદ કરી રહ્યા છે.
આ વર્ષે કિંમતી ધાતુઓના ભાવમાં ગત વર્ષની સરખામણીએ બમણાથી વધુનો વધારો જોવા મળ્યો છે. અમદાવાદમાં સોનાનો ભાવ પ્રતિ 10 ગ્રામ રૂ. 1.7 લાખ પહોંચ્યો છે, જે ગત વર્ષે રક્ષાબંધનના સમયે રૂ. 1.02 લાખની આસપાસ હતો. તેવી જ રીતે, ચાંદીનો ભાવ પ્રતિ કિલોગ્રામ રૂ. 2.45 લાખે પહોંચ્યો છે, જે ગત વર્ષે માત્ર રૂ. 1.17 લાખ હતો. આટલા ઊંચા ભાવ વધારા છતાં તહેવારના માહોલમાં શોપિંગમાં કોઈ કમી આવી નથી.
જ્વેલર્સ એસોસિએશન ઓફ અમદાવાદના પ્રેસિડેન્ટ જીગર સોનીના જણાવ્યા અનુસાર, આ વખતે સોના-ચાંદીની રાખડીઓ, ક્રોકરી આઈટમ્સ, સિક્કા અને રૂ. 5,000 સુધીની બજેટ ફ્રેન્ડલી ગિફ્ટ આર્ટિકલ્સની માંગ ખૂબ જ મજબૂત છે. લોકો હવે પરંપરાગત ભેટના બદલે જ્વેલરીને રક્ષાબંધનની કાયમી અને કિંમતી ભેટ તરીકે વધુ પસંદ કરી રહ્યા છે.
ગ્રાહકોના આ બદલાતા ટ્રેન્ડને પહોંચી વળવા વેપારીઓ પણ નવી પ્રોડક્ટ્સ લાવી રહ્યા છે. ખાસ કરીને 9-કેરેટ અને 14-કેરેટ ગોલ્ડ જ્વેલરી તેમજ લેબ-ગ્રોન ડાયમંડ (LGD) તરફ ગ્રાહકોનો ઝુકાવ વધ્યો છે. દૈનિક ઉપયોગ માટે 1.5 થી 2 ગ્રામ સુધીની હળવા વજનની ચેઈન, વીંટીઓ અને નાના પેન્ડન્ટ્સનું વેચાણ ઝડપથી વધી રહ્યું છે.
લેબ-ગ્રોન ડાયમંડ જ્વેલરી કંપનીના ડિરેક્ટર પરમ બેગાણીએ જણાવ્યું હતું કે, “સોનાના ઊંચા ભાવોના કારણે યુવા વર્ગમાં લેબ-ગ્રોન ડાયમંડની લોકપ્રિયતા ખૂબ વધવા પામી છે. તે નેચરલ ડાયમંડ જેવા જ લુક સાથે પોસાય તેવા બજેટમાં મળી રહે છે.” જ્યારે અન્ય અગ્રણી જ્વેલર આશિષ ઝવેરીના મતે, તાજેતરમાં સોના-ચાંદીના ભાવમાં થયેલા આંશિક કરેક્શનને કારણે પણ બજારમાં સુધારો થયો છે. યુવાનો 9-કેરેટ ખરીદી રહ્યા છે, જ્યારે શુદ્ધતાના આગ્રહી ગ્રાહકો 22-કેરેટ તરફ જ પસંદગી ઉતારી રહ્યા છે.
ઉલ્લેખનીય છે કે, રક્ષાબંધનની ખરીદીની સાથે સાથે આગામી લગ્નસરાની સિઝન માટેની એડવાન્સ બુકિંગ અને શોપિંગનો પણ પ્રારંભ થઈ ચૂક્યો છે. સિલ્વર રાખડીઓ અને 2 ગ્રામ સુધીની સ્માર્ટ ગોલ્ડ જ્વેલરીએ આ વર્ષે તહેવારના આકર્ષણનું મુખ્ય કેન્દ્ર બનીને બજારમાં રોનક લાવી દીધી છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
