‘મેડ ઇન ઇન્ડિયા’ જ્વેલરી વિશ્વની સહુથી વધુ વિશ્વાસપાત્ર પસંદગી બનવી જોઈએ : IIJS ભારત પ્રીમિયર ૨૦૨૬માં કેન્દ્રીય મંત્રી ચિરાગ પાસવાન

DIAMOND CITY NEWS, SURAT

ભારત સરકારના ખાદ્ય પ્રક્રિયા ઉદ્યોગ મંત્રી શ્રી ચિરાગ પાસવાને બોમ્બે એક્ઝિબિશન સેન્ટર (BEC), ગોરેગાંવ ખાતે IIJS ભારત પ્રીમિયર ૨૦૨૬ ની ૪૨મી એડિશનના ગોરેગાંવ વેન્યુનું વિધિવત ઉદ્ઘાટન કર્યું હતું. આ પ્રસંગે તેમણે વૈશ્વિક મંચ પર ‘બ્રાન્ડ ઇન્ડિયા’ (Brand India) ને મજબૂત કરવામાં ભારતીય જેમ્સ એન્ડ જ્વેલરી ક્ષેત્રના મહત્વના યોગદાન પર ભાર મૂક્યો હતો.

આ ઉદ્ઘાટન સમારોહમાં ગેસ્ટ ઓફ ઓનર તરીકે ડી બીયર્સ ગ્રુપના ડાયમંડ ટ્રેડિંગના એક્ઝિક્યુટિવ વાઇસ પ્રેસિડેન્ટ પૌલ રોવલી, મલબાર ગ્રુપના વાઇસ ચેરમેન કે.પી. અબ્દુલ સલામ, અને ઇન્ડિયા ગોલ્ડ મેટાવર્સ પ્રાઇવેટ લિમિટેડના મેનેજિંગ ડિરેક્ટર અને સીઈઓ લેમોન રૂટેન ખાસ ઉપસ્થિત રહ્યા હતા. જ્યારે GJEPC તરફથી ચેરમેન કિરીટ ભણશાલી, વાઇસ ચેરમેન શૌનક પરીખ અને એક્ઝિક્યુટિવ ડિરેક્ટર સબ્યસાચી રોયે હાજરી આપી હતી.

કેન્દ્રીય મંત્રી ચિરાગ પાસવાનનું સંબોધન

ઉદ્ઘાટન પ્રસંગે ઉપસ્થિત જનમેદનીને સંબોધતા કેન્દ્રીય મંત્રી શ્રી ચિરાગ પાસવાને જણાવ્યું હતું કે, “IIJS ભારત પ્રીમિયર ખાતે લગભગ ૮૦ થી વધુ દેશોના પ્રતિનિધિઓની ભાગીદારી ભારતના જેમ્સ અને જ્વેલરી ઉદ્યોગ પ્રત્યે વધતા જતા વૈશ્વિક વિશ્વાસને દર્શાવે છે. વડાપ્રધાન શ્રી નરેન્દ્ર મોદીના નેતૃત્વ હેઠળ સરકાર ‘ઈઝ ઓફ ડુઇંગ બિઝનેસ’ ને મજબૂત કરવા, ક્ષેત્રના અવરોધો દૂર કરવા અને વિકાસના નવા અવસરો ઊભા કરવા માટે સતત નીતિગત સુધારા કરવા કટિબદ્ધ છે.

જેમ જેમ ભારત ‘વિકસિત ભારત ૨૦૪૭’ ના વિઝન તરફ આગળ વધી રહ્યું છે, તેમાં જ્વેલરી સેક્ટર મહત્વની ભૂમિકા ભજવશે. હું આ ઉદ્યોગને ગુણવત્તા અને કારીગરીના સર્વોચ્ચ ધોરણો જાળવવાની અપીલ કરું છું જેથી ‘મેડ ઇન ઇન્ડિયા’ વિશ્વભરના ગ્રાહકોનો વિશ્વાસ જીતવાનું ચાલુ રાખે અને બ્રાન્ડ ઇન્ડિયાની વૈશ્વિક પ્રતિષ્ઠા વધારે.”

ઉદ્યોગ સાહસિકો અને દિગ્ગજોના નિવેદનો

• કિરીટ ભાનુશાલી (ચેરમેન, GJEPC) : તેમણે જણાવ્યું કે ભારત હવે માત્ર વિશ્વનું મેન્યુફેક્ચરિંગ હબ નથી રહ્યું, પરંતુ સમગ્ર ગ્લોબલ જેમ્સ એન્ડ જ્વેલરી સેક્ટરમાં નેતૃત્વ કરી રહ્યું છે. દેશના તાજેતરના ફ્રી ટ્રેડ એગ્રીમેન્ટ્સ (FTAs), કિંબરલી પ્રોસેસનું ચેરમેનપદ, વર્લ્ડ ફેડરેશન ઓફ ડાયમંડ બુર્સેસનું પ્રેસિડેન્ટપદ અને વર્લ્ડ ડાયમંડ કાઉન્સિલનું વાઇસ પ્રેસિડેન્ટપદ ભારતના વધતા વૈશ્વિક પ્રભાવનું ઉદાહરણ છે. તેમણે વિશ્વસ્તરીય ઈન્ફ્રાસ્ટ્રક્ચર અને સુધારાઓ દ્વારા ૨૦૪૭ સુધીમાં $૧૦૦ બિલિયનના નિકાસ લક્ષ્યાંકને હાંસલ કરવાની GJEPCની પ્રતિબદ્ધતા દોહરાવી હતી.
• પૌલ રોવલી (એક્ઝિક્યુટિવ વાઇસ પ્રેસિડેન્ટ, De Beers Group) : તેમણે નોંધ્યું કે ભારત ડી બીયર્સ માટે માત્ર એક બજાર નથી પરંતુ એક વિશ્વસનીય ભાગીદાર અને કુદરતી હીરાના આગામી અધ્યાયનું સહ-લેખક છે. તમામ વૈશ્વિક પડકારો છતાં ભારત નેચરલ ડાયમંડ માટે સૌથી ઝડપથી વિકસતું માર્કેટ રહ્યું છે.
• કે. પી. અબ્દુલ સલામ (વાઇસ ચેરમેન, Malabar Group) : તેમણે ઉમેર્યું કે આ ભારતીય જ્વેલરી માટેનો સુવર્ણ સમય છે. હવે આપણે માત્ર આંતરરાષ્ટ્રીય બ્રાન્ડ્સ માટે મેન્યુફેક્ચરિંગ કરવાને બદલે વૈશ્વિક સ્તરે આદરણીય એવી ભારતીય બ્રાન્ડ્સ બનાવી રહ્યા છીએ.
• લેમોન રૂટેન (મેનેજિંગ ડિરેક્ટર અને સીઈઓ, India Gold Metaverse) : તેમણે જ્વેલરી રિટેલમાં ટેકનોલોજીના વધતા ઉપયોગ પર ભાર મૂકતા જણાવ્યું કે ડિજિટલ ઈકોસિસ્ટમ દ્વારા રિટેલર્સ પોતાની વર્કિંગ કેપિટલ વધાર્યા વિના દેશભરના ગ્રાહકો સુધી પહોંચી શકે છે અને ભવિષ્યનો જ્વેલર ટેકનોલોજીના સહારે નેશનલ રિટેલર બનશે.

IIJS ભારત પ્રીમિયર ૨૦૨૬ ની મુખ્ય વિગતો

વિશ્વના બીજા સૌથી મોટા B2B જેમ એન્ડ જ્વેલરી પ્રદર્શન તરીકે ઓળખાતું IIJS ભારત પ્રીમિયર ૨૦૨૬ મુંબઈના બે અલગ-અલગ સ્થળોએ ૧,૩૫,૦૦૦ ચોરસ મીટર કરતાં વધુ ક્ષેત્રફળમાં આયોજિત કરાયું છે :

• પ્રદર્શનનું કદ: ૧,૩૫,૦૦૦+ ચો.મી. ક્ષેત્રફળ, ૩,૬૦૦+ સ્ટોલ, અને ૨,૧૦૦+ થી વધુ એક્ઝિબિટર્સ.
• મુલાકાતીઓ: ૮૦ થી વધુ દેશોના ૨,૭૦૦+ આંતરરાષ્ટ્રીય ખરીદદારો સહિત ૫૦,૦૦૦ થી વધુ ટ્રેડ બાયર્સ.
• સ્થળ અને તારીખ:

૧. જિયો વર્લ્ડ કન્વેન્શન સેન્ટર (JWCC), BKC: ૫ થી ૯ ઓગસ્ટ, ૨૦૨૬.
૨. બોમ્બે એક્ઝિબિશન સેન્ટર (BEC), નેસ્કો, ગોરેગાંવ: ૬ થી ૧૦ ઓગસ્ટ, ૨૦૨૬.

• વિશેષતા : ભારત પ્રીમિયર B2B શો તરીકે આ વર્ષે IIJS પોતાના સફળ ૨૫ વર્ષ (સિલ્વર જ્યુબિલી) પૂર્ણ કરી રહ્યું છે.
• સમાંતર એક્સ્પો અને ઇવેન્ટ્સ : BEC ખાતે ૬ થી ૧૦ ઓગસ્ટ દરમિયાન આધુનિક મશીનરી માટે IGJME એક્સ્પો આયોજિત કરાયો છે. આ ઉપરાંત લક્ઝરી કૌચર જ્વેલરી માટે ‘ધ સિલેક્ટ ક્લબ’, યુવા નેતાઓ માટે ’20 Under 40′, ટેક-સ્ટાર્ટઅપ્સ માટે ‘જ્વેલસ્ટાર્ટ ડેમો ડે’ અને હીરા, એઆઈ તથા વૈશ્વિક વેપાર પર નિષ્ણાતોના સેમિનાર માટે ‘ઇનોવેટ ટોક્સ’ જેવા વિશેષ આકર્ષણો સામેલ છે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube