વર્લ્ડ ડાયમંડ કોંગ્રેસમાં ગુંજશે ગોલકોંડા હીરાનો ઈતિહાસ

DIAMOND CITY NEWS, SURAT

આંતરરાષ્ટ્રીય સ્તરે હીરા ઉદ્યોગની સૌથી મોટી અને પ્રતિષ્ઠિત ગણાતી ’41મી વર્લ્ડ ડાયમંડ કોંગ્રેસ’ (41st World Diamond Congress) માં આ વર્ષે ભારતનો ભવ્ય અને ઐતિહાસિક હીરા વારસો આકર્ષણનું કેન્દ્ર બનશે. આગામી 15 જુલાઈ 2026 ના રોજ, જાણીતા જ્વેલરી ઈતિહાસકાર, સંશોધક અને લેખિકા ડૉ. ઉષા બાલકૃષ્ણન “ગોલકોંડા અને પ્રાચીન હીરા – એક ઐતિહાસિક પરિપ્રેક્ષ્ય” (Golconda and Ancient Diamonds – A Historical Perspective) વિષય પર એક વિશેષ અને મહત્વપૂર્ણ વ્યાખ્યાન રજૂ કરશે.

આ ખાસ સત્ર દરમિયાન ડૉ. બાલકૃષ્ણન એ વાત પર વિસ્તૃત પ્રકાશ પાડશે કે કેવી રીતે ભારત લગભગ 2,000 વર્ષ સુધી સમગ્ર વિશ્વમાં હીરાનો એકમાત્ર સ્ત્રોત (Sole Source) રહ્યો હતો. આ સાથે જ તેઓ હૈદરાબાદ નજીક આવેલા વિશ્વપ્રસિદ્ધ ‘ગોલકોંડા’ (Golconda) ના કિલ્લા અને તેની ખાણોના અદભુત વારસાની ચર્ચા કરશે, જે ખાણોએ ઈતિહાસના સૌથી અસાધારણ, શુદ્ધ અને કિંમતી હીરા વિશ્વને આપ્યા છે. લક્ઝરી જર્નાલિસ્ટ અને લેખિકા રિચા ગોયલ સિકરી દ્વારા આ સત્રનું સંચાલન (Moderation) કરવામાં આવશે. આ પ્રસ્તુતિમાં પ્રાચીન ગ્રંથો, વિદેશી પ્રવાસીઓના પ્રવાસ વર્ણનો અને વિશ્વ વિખ્યાત જેમસ્ટોન્સના પુરાવાઓ દ્વારા હીરાના ઈતિહાસ પાછળની દંતકથાઓ અને વાસ્તવિક ઐતિહાસિક રેકોર્ડ વચ્ચેનો તફાવત સ્પષ્ટ કરવામાં આવશે. આ ઉપરાંત, પ્રખ્યાત ‘ઓર્લોવ ડાયમંડ’ (Orlov Diamond) જેવા અદ્ભુત હીરાઓ સાથે જોડાયેલા રહસ્યો અને વૈશ્વિક બજારમાં ‘ગોલકોંડા’ નામના અસાધારણ મહત્વ પર ફરીથી ચર્ચા કરવામાં આવશે.

વર્લ્ડ ડાયમંડ કોંગ્રેસ 2026 ની વિગતો:

વર્લ્ડ ફેડરેશન ઓફ ડાયમંડ બોર્સીસ (WFDB) અને ઈન્ટરનેશનલ ડાયમંડ મેન્યુફેક્ચરર્સ એસોસિએશન (IDMA) દ્વારા સંયુક્ત રીતે આયોજિત આ કોંગ્રેસ 12 થી 15 જુલાઈ દરમિયાન સિંગાપોરના ‘પાર્કરોયલ કલેક્શન મરીના બે’ ખાતે યોજાશે. આ વૈશ્વિક મહાસંમેલન ‘સિંગાપોર ઈન્ટરનેશનલ જ્વેલરી એક્સ્પો’ (SIJE) ની સાથે જ સમાંતર રીતે યોજાઈ રહ્યું છે, જેમાં વિશ્વભરના હીરા અને જ્વેલરી ઉદ્યોગના અગ્રણીઓ, વેપારીઓ અને નીતિનિર્માતાઓ ઉદ્યોગના ભવિષ્ય અને નવા પ્રવાહો પર મંથન કરવા એકઠા થશે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube