DIAMOND CITY NEWS, SURAT
વિશ્વમાં કુદરતી હીરા (Natural Diamonds) નું સૌથી મોટું ઉત્પાદક ગણાતા રશિયાએ લેબ-ગ્રોન એટલે કે કૃત્રિમ હીરાના વેચાણ, માર્કેટિંગ અને લેબલિંગને લઈને અત્યાર સુધીના સૌથી કડક નિયમો જાહેર કર્યા છે.
રશિયન ફેડરેશનની સરકાર દ્વારા ૩૦ મે ૨૦૨૬ના રોજ પસાર કરાયેલા ઐતિહાસિક પ્રસ્તાવ સંખ્યા ૬૫૭ (Resolution No. 657) હેઠળ આ નવા નિયમો મંજૂર કરવામાં આવ્યા છે.
આ કાયદો આગામી ૧ સપ્ટેમ્બર ૨૦૨૬ થી સમગ્ર રશિયામાં સત્તાવાર રીતે લાગુ કરી દેવામાં આવશે. આ નવા નિયમોનો મુખ્ય હેતુ ગ્રાહકોને છેતરપિંડીથી બચાવવાનો અને કુદરતી તેમજ કૃત્રિમ હીરા વચ્ચેનો તફાવત બિલકુલ સ્પષ્ટ કરવાનો છે.
રશિયાના કિંમતી ધાતુ અને રત્નોના છૂટક વેચાણ કાયદામાં કરવામાં આવેલા આ મોટા સુધારા મુજબ, જો કોઈ જ્વેલરીમાં લેબ-ગ્રોન કે કૃત્રિમ પથ્થરનો ઉપયોગ કરવામાં આવ્યો હશે, તો તેના પ્રાઇસ ટેગ (લેબલ) પર ખૂબ જ મોટા અક્ષરોમાં “સિન્થેટિક” (Synthetic) અથવા તેનું માન્ય ટૂંકું નામ “Synthet.” લખવું ફરજિયાત રહેશે.
‘ડાયમંડ’ (હીરો) શબ્દ વાપરવા પર સંપૂર્ણ પ્રતિબંધ
આ નવા કાયદાની સૌથી કડક જોગવાઈ એ છે કે લેબમાં બનેલા કોઈપણ કૃત્રિમ પથ્થર કે હીરા માટે “ડાયમંડ” (Diamond – હીરો) શબ્દ અથવા તેનાથી બનતા અન્ય કોઈ પણ શબ્દોનો પ્રયોગ કરવા પર સંપૂર્ણપણે પ્રતિબંધ (Banned) મૂકી દેવામાં આવ્યો છે.
માર્કેટિંગ પર સખત બ્રેક : કંપનીઓ કે રિટેલર્સ લેબ-ગ્રોન હીરાની જાહેરાત કે વેચાણ કરતી વખતે નેચરલ હીરા માટે વપરાતા ક્વોલિટી અને કલર ગ્રેડિંગના માપદંડો (જેવા કે D કલર, VVS1 ક્લેરિટી વગેરે) નો ઉપયોગ બિલકુલ કરી શકશે નહીં.
આ ૭ જાદુઈ શબ્દો પર લાગી ગયો કાયમી પ્રતિબંધ
રશિયન સરકારના નવા આદેશ અનુસાર, ગ્રાહકોને ભ્રમિત કરતા અને આકર્ષક લાગતા નીચેના શબ્દોનો ઉપયોગ કૃત્રિમ હીરા માટે કાયદાકીય ગુનો ગણાશે:
- કિંમતી (Precious)
- અસલી (Real / Genuine)
- કુદરતી (Natural)
- ખાણમાંથી નીકળેલું (Mined)
- ખનિજ (Mineral)
- ઈકો-ફ્રેન્ડલી (Eco-friendly)
કંપનીઓ પર્યાવરણને અનુકૂળ હોવાનો દાવો કરીને પણ ગ્રાહકોને આકર્ષી શકશે નહીં. આ ઉપરાંત, ભૌતિક આંકડાઓમાં પણ એક મોટો ફેરફાર કરવામાં આવ્યો છે.
અત્યાર સુધી તમામ પ્રકારના હીરાને ‘કેરેટ’ (Carat) માં માપવામાં આવતા હતા, પરંતુ હવે રશિયામાં કૃત્રિમ હીરાનું વજન કેરેટના બદલે માત્ર ગ્રામ (Grams) માં જ દર્શાવવું પડશે. આ તમામ નિયમો પ્રોડક્ટના ટેગ, ઓનલાઈન વેબસાઈટ, ડિજિટલ પ્રમોશન અને દુકાનની અંદર થતી તમામ પ્રકારની માર્કેટિંગ સામગ્રી પર સમાન રીતે લાગુ પડશે.
રશિયાના આ નિર્ણય પાછળનું સાચું ગણિત
વિશ્વમાં વજન (વોલ્યુમ) ની દ્રષ્ટિએ રશિયા કુદરતી હીરાનું સૌથી મોટું ઉત્પાદક છે અને સરકારી માલિકીની કંપની અલરોસા (Alrosa) આ ઉદ્યોગનું નેતૃત્વ કરે છે.
હાલમાં વૈશ્વિક બજારમાં લેબ-ગ્રોન હીરાની સપ્લાય સતત વધવાને કારણે કુદરતી હીરાના અસ્તિત્વ અને કિંમતો સામે મોટો પડકાર ઊભો થયો છે. આ કડક કાયદા દ્વારા રશિયા પોતાના કુદરતી હીરાના સામ્રાજ્યને બચાવવા માંગે છે અને બજારમાં ન્યાયી સ્પર્ધા જાળવી રાખવા માંગે છે.
રિટેલ સેક્ટરના નિષ્ણાતોના મતે, રશિયાના આ કડક પગલા બાદ આગામી સમયમાં ભારત, અમેરિકા અને યુરોપિયન યુનિયન (EU) ના બજારોમાં પણ લેબ-ગ્રોન હીરાના નામે થતી છેતરપિંડી રોકવા માટે આવા જ કડક કાયદાઓ લાવવા માટે દબાણ વધશે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
