DIAMOND CITY NEWS, SURAT
રશિયાના સોનાના ખનન (ગોલ્ડ માઇનિંગ) ઉદ્યોગમાં એક બહુ મોટો અને ચોંકાવનારો ફેરફાર સામે આવ્યો છે. રશિયન સરકાર દ્વારા તાજેતરમાં જ રાષ્ટ્રીયકૃત કરાયેલી દેશની અગ્રણી ગોલ્ડ માઇનિંગ કંપની ‘યુઝુરાલઝોલોટો’ (Yuzhuralzoloto Group – YUGK) નો માલિકી હક હવે એક નવા બિઝનેસ ગ્રૂપના હાથમાં ગયો છે.
ચેચન મૂળના જાણીતા ઉદ્યોગપતિ રુસ્લાન બાયસારોવની માલિકીની કંપની ‘JSC BTS-Most Holding’ એ આ હરાજી જીતી લીધી છે. આ સોદો મૂળ નક્કી કરાયેલી શરૂઆતી કિંમત કરતાં લગભગ અડધી કિંમતે (તમામ ટેક્સ અને શરતો સાથે) અંતિમ ઓપ પામ્યો છે, જે રશિયન કોર્પોરેટ જગતમાં ભારે ચર્ચાનો વિષય બન્યો છે.
ફેડરલ પ્રોપર્ટી મેનેજમેન્ટ એજન્સી દ્વારા જાહેર કરવામાં આવેલી સત્તાવાર માહિતી અનુસાર, આ સોદો ‘ડચ ઓક્શન’ ફોર્મેટમાં યોજવામાં આવ્યો હતો. આ પ્રક્રિયામાં શરૂઆતની ઊંચી કિંમતથી બોલી શરૂ કરીને ધીમે-ધીમે ભાવ ઘટાડવામાં આવે છે, જ્યાં સુધી કોઈ ખરીદનાર તૈયાર ન થાય.
આ હરાજીની શરૂઆતી કિંમત ૧૬૨.૦૨ અબજ રુબલ (આશરે ૨.૨૨ અબજ ડોલર) નક્કી કરવામાં આવી હતી, પરંતુ અંતે ‘JSC BTS-Most Holding’ એ ૯૩.૧૬ અબજ રુબલ (આશરે ૧.૨૮ અબજ ડોલર) ની કિંમતે આ મસમોટી સંપત્તિ પોતાના નામે કરી લીધી છે.
આ હરાજીમાં કુલ ચાર મોટા બિડર્સે ભાગ લીધો હતો, અને નિયમ મુજબ આ લોટની ન્યૂનતમ અંદાજિત કિંમત શરૂઆતી કિંમતના ૫૦ ટકા એટલે કે ૮૧ અબજ રુબલ (૧.૧ અબજ ડોલર) સુધી નીચે જઈ શકે તેમ હતી.
આ સમગ્ર મામલાની પૃષ્ઠભૂમિ પર નજર કરીએ તો, ગયા વર્ષે જુલાઈ મહિનામાં ચેલ્યાબિન્સ્ક પ્રાદેશિક અદાલતે રશિયાના પ્રોસિક્યુટર જનરલ ઓફિસની અરજીને માન્ય રાખીને એક મોટો ચુકાદો આપ્યો હતો.
અદાલતે કંપનીના તત્કાલીન માલિક કોન્સ્ટેન્ટિન સ્ટ્રુકોવના વ્યવસાયના ‘ભ્રષ્ટ મૂળ’ અને ગેરકાયદેસર નાણાકીય લેવડદેવડના ગંભીર આરોપોને યોગ્ય ઠેરવ્યા હતા. કોર્ટે સ્ટ્રુકોવના ભ્રષ્ટાચારના કારણે YUGK માં રહેલા તેમના તમામ શેર અને હિસ્સાને જપ્ત કરીને સરકારી હસ્તક (રાષ્ટ્રીયકૃત) કરવાનો આદેશ આપ્યો હતો.
હરાજીની પ્રક્રિયા પૂર્ણ થયા બાદ હવે ખરીદનાર કંપની સાથે કાયદેસરના ખરીદ-વેચાણ કરાર પર હસ્તાક્ષર કરવામાં આવશે. આ પ્રક્રિયા પૂરી થતાં જ સોદાની તમામ રકમ સીધી રશિયાના ફેડરલ બજેટ (સરકારી તિજોરી) માં જમા કરવામાં આવશે. આ સોદાથી રશિયાના વ્યૂહાત્મક ગોલ્ડ સેક્ટરમાં રુસ્લાન બાયસારોવનું કદ અને પ્રભુત્વ ઘણું વધી જશે તેવું બજારના નિષ્ણાતોનું માનવું છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
