DIAMOND CITY NEWS, SURAT
દક્ષિણ આફ્રિકાના નામિબિયામાં આવેલી જાણીતી ‘એલિઝાબેથ બે’ ડાયમંડ માઇનને ફરીથી ધમધમતી કરવા માટેની તૈયારીઓ શરૂ કરી દેવામાં આવી છે. ભૂતકાળમાં અનેક વખત બંધ થવા, માલિકી બદલાવા અને ઉત્પાદન લક્ષ્યાંકો પૂરા કરવામાં નિષ્ફળ રહેવાના લાંબા ઈતિહાસ બાદ આ ખાણને ફરી એકવાર નવું જીવન મળવા જઈ રહ્યું છે.
એમ્સ્ટરડેમ-સ્થિત ડચ પ્રાઇવેટ ઇક્વિટી અને સ્પેશિયલ સિચ્યુએશન્સ ઇન્વેસ્ટર ‘કેન્ઝોલ કેપિટલ’ દ્વારા નામિબિયામાં નોંધાયેલી કંપની ‘MSF કોમર્શિયલ્સ’ સાથે હાથ મિલાવવામાં આવ્યા છે. આ બંને ભાગીદારો દક્ષિણ નામિબિયાના લ્યુડેરિટ્ઝ નજીક આવેલી ‘સ્પેરગેબીયેટ ડાયમંડ માઇન’ (જે અગાઉ એલિઝાબેથ બે માઇન તરીકે ઓળખાતી હતી) માં ઉત્પાદન પ્રવૃત્તિઓ પુનઃશરૂ કરશે.
આ ખાણમાંથી વ્યાપારી ઉત્પાદન નવેમ્બર મહિનાથી ફરી શરૂ થવાની ધારણા છે. જરૂરી તમામ રેગ્યુલેટરી અને સરકારી મંજૂરીઓ મળ્યા બાદ, ભાગીદાર કંપનીઓ દ્વારા આશરે 50 મિલિયન યુએસ ડોલર (આશરે ₹420 કરોડથી વધુ) નું રોકાણ કરવાનો લક્ષ્યાંક રાખવામાં આવ્યો છે. આ જંગી રોકાણના માધ્યમથી કંપનીઓ માઇનમાંથી માત્ર હીરા જ નહીં પરંતુ હેવી મિનરલ સેન્ડ્સ અને અન્ય ક્રિટિકલ મેટલ્સના ઉત્ખનન અને ઉત્પાદનની તકો પણ શોધી રહી છે.
કંપનીના સત્તાવાર અહેવાલો મુજબ, આ માઇનિંગ સાઇટ પર જમીન પર 6.3 મિલિયન કેરેટ અને દરિયાઈ વિસ્તારમાં 4.2 મિલિયન કેરેટ મળીને કુલ 10.5 મિલિયન કેરેટના વિશાળ હીરાના અનામત ભંડારો ઉપલબ્ધ છે.
કેન્ઝોલ કેપિટલના ચીફ એક્ઝિક્યુટિવ ઓફિસર કોર્ને મેલિસેન એ આ પ્રોજેક્ટ અંગે વિગત આપતાં જણાવ્યું હતું કે, “એલિઝાબેથ બે માઇન છેલ્લા આઠ વર્ષમાંથી મોટા ભાગનો સમય નિષ્ક્રિય અને બંધ હાલતમાં રહી છે. અમારો મુખ્ય ઉદ્દેશ્ય આ ખાણને ફરીથી પૂર્ણ ક્ષમતા સાથે ચાલુ કરવાનો છે, જેથી આ વિસ્તારના લોકોને નવી રોજગારી મળી રહે અને સ્થાનિક અર્થતંત્રને આર્થિક મૂલ્ય મળી શકે, કારણ કે આ સમગ્ર વિસ્તાર સદી કરતાં પણ વધુ સમયથી હીરા ઉદ્યોગ પર નિર્ભર રહ્યો છે. આ ભાગીદારી નામિબિયા દેશમાં અમારા લાંબા ગાળાના રોકાણ અને કટિબદ્ધતાનો એક ભાગ છે, જેમાં હીરા અમારો પ્રારંભિક પોઇન્ટ છે અને આગામી સમયમાં અન્ય કિંમતી ખનિજો પર કામ કરવામાં આવશે.”
એલિઝાબેથ બે માઇનનો ઈતિહાસ અને ભૂતકાળના પડકારો :
- શરૂઆત (1911) : એલિઝાબેથ બે ખાતે હીરાનું ખાણકામ સૌપ્રથમ વર્ષ 1911 માં શરૂ થયું હતું, પરંતુ વિશ્વયુદ્ધો અને વૈશ્વિક આર્થિક મંદીના કારણે તેનો વ્યવસાય વારંવાર ખોરવાતો રહ્યો હતો.
- નવા યુગની શરૂઆત (1991) : આધુનિક ખાણકામની શરૂઆત 1991 માં ‘કોન્સોલિડેટેડ ડાયમંડ માઇન્સ’ દ્વારા કરવામાં આવી હતી, જે બાદમાં નામિબિયા સરકાર અને ડી બીયર્સ (De Beers) વચ્ચેની 50:50 ટકાની સંયુક્ત ભાગીદારી કંપની ‘નામડેબ’ નો હિસ્સો બની ગઈ હતી.
- પ્રથમ વખત બંધ અને પુનઃશરૂઆત (2009-2011) : ઓપરેશનલ ખર્ચ વધતા નામડેબે 2009 માં માઇનને ‘કેર એન્ડ મેન્ટેનન્સ’ હેઠળ મૂકી બંધ કરી દીધી હતી. બાદમાં ખર્ચ ઘટાડવા પ્રોજેક્ટ રી-ડિઝાઇન કરીને નવેમ્બર 2011 માં ઉત્પાદન પુનઃશરૂ કરાયું હતું.
- બીજી વખત બંધ (2018) : આર્થિક રીતે માઇન ચલાવવી ફાયદાકારક ન લાગતા નામડેબે સપ્ટેમ્બર 2018 માં ખાણ ફરી બંધ કરી દીધી હતી.
- નવા માલિકો અને નિષ્ફળતા (2020-2023) : 2020 માં આ માઇન અને સંબંધિત મરીન સંપત્તિઓ નામિબિયાના એક સ્થાનિક કન્સોર્ટિયમને વેચવામાં આવી હતી. નવા માલિકોએ 2022 માં ઉત્પાદન શરૂ કર્યું, પરંતુ લક્ષ્યાંક કરતાં ખૂબ ઓછું ઉત્પાદન મળતાં માર્ચ 2023 માં કામગીરી ફરી અટકી ગઈ. તદુપરાંત, બાકી વીજ બિલ ન ચૂકવવાના કારણે દેશની વીજ કંપની ‘નામપાવર’ એ ખાણનો વીજ પુરવઠો પણ કાપી નાખ્યો હતો.
હવે, કેન્ઝોલ કેપિટલ અને MSF કોમર્શિયલ્સના માધ્યમથી $50 મિલિયનના નવા મૂડીરોકાણ સાથે આ ઐતિહાસિક હીરાની ખાણ ફરી એકવાર ધમધમતી થાય છે કે કેમ તેના પર સમગ્ર વૈશ્વિક ડાયમંડ ઉદ્યોગની નજર ટકેલી છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
