અમેરિકામાં ૪૩% ગ્રાહકો આ ફેસ્ટિવલ સિઝનમાં દાગીનાની ખરીદીમાં કાપ મૂકશે

DIAMOND CITY NEWS, SURAT 

વૈશ્વિક આર્થિક અનિશ્ચિતતાઓ વચ્ચે આગામી હોલિડે અને ફેસ્ટિવલ સિઝન દરમિયાન અમેરિકાના જ્વેલરી માર્કેટ માટે નબળા સંકેતો સામે આવ્યા છે. વિશ્વપ્રસિદ્ધ રિસર્ચ અને કન્સલ્ટન્સી ફર્મ ‘મેકકિન્સી એન્ડ કંપની’  દ્વારા હાથ ધરવામાં આવેલા તાજેતરના સર્વેક્ષણ અનુસાર, યુએસએના ૪૩% ગ્રાહકોએ ચાલુ વર્ષે તહેવારોની સિઝનમાં જ્વેલરી પાછળ અગાઉ કરતાં ઓછો ખર્ચ કરવાની યોજના વ્યક્ત કરી છે. સામે પક્ષે માત્ર ૧૮% ગ્રાહકોએ જ જ્વેલરીમાં વધુ ખર્ચ કરવાનો ઈરાદો દર્શાવ્યો છે, જ્યારે ૩૯% ગ્રાહકોએ ગયા વર્ષ જેટલો જ ખર્ચ જાળવી રાખવાની વાત કરી છે.

મેકકિન્સી દ્વારા ૨૯ જુલાઈ થી ૫ ઓગસ્ટ, ૨૦૨૬ દરમિયાન અમેરિકી ગ્રાહકોની માનસિકતા અને રજાઓના બજેટ પર “અન અપડેટ ઓન યુએસ કન્ઝ્યુમર સેન્ટિમેન્ટ: હોલિડે બજેટિંગ બિગિન્સ” શીર્ષક હેઠળ આ વિસ્તૃત રિસર્ચ કરવામાં આવ્યું હતું. આ રિપોર્ટમાં જ્વેલરી સેક્ટર માટે ‘નેટ સ્પેન્ડિંગ ઈન્ટેન્ટ’ (ખર્ચ કરવાનો ચોખ્ખો ઈરાદો) માઈનસ ૨૫% (-25%) નોંધાયો છે, જે વધુ ખર્ચ કરનારા ૧૮% અને ઓછો ખર્ચ કરનારા ૪૩% વચ્ચેનો તફાવત દર્શાવે છે. આ આંકડા દર્શાવે છે કે ગ્રાહકો પોતાના બિન-જરૂરી અથવા વૈભવી ખર્ચાઓમાં સૌથી મોટો કાપ જ્વેલરી ક્ષેત્રે મૂકી રહ્યા છે.

અભ્યાસ દર્શાવે છે કે આગામી હોલિડે સિઝનમાં અમેરિકી ગ્રાહકોનું કુલ ઓવરઓલ બજેટ તો સ્થિર છે, પરંતુ તેઓ પોતાના નાણાં ક્યાં ખર્ચવા તે અંગે અત્યંત પસંદગીયુક્ત બન્યા છે. તમામ કેટેગરીઝના એકંદરે ખર્ચની વાત કરીએ તો, ૪૭% ગ્રાહકોએ ગયા વર્ષ જેટલો જ ખર્ચ કરવાની, ૨૩% ગ્રાહકોએ વધુ ખર્ચ કરવાની અને ૨૧% ગ્રાહકોએ ઓછો ખર્ચ કરવાની યોજના બનાવી છે. સર્વેક્ષણ કરવામાં આવેલી કુલ ૨૨ ડિસ્ક્રિપ્શનરી કેટેગરીઝમાં જ્વેલરી સાથે સંકળાયેલી ‘એક્સેસરીઝ’ કેટેગરી -૩૦% નેટ સ્પેન્ડિંગ ઈન્ટેન્ટ સાથે બીજા સૌથી નીચલા સ્તરે રહી છે, જ્યારે હોમ ડેકોર (માઈનસ ૩૨%) સૌથી નીચલા ક્રમે રહ્યું છે.

મેકકિન્સીના વિશ્લેષણ મુજબ, ગ્રાહકો તેમના કુલ તહેવારોના બજેટને જાળવી રાખીને વૈભવી ખરીદીઓમાંથી પાછા હટી રહ્યા છે. આ પરિસ્થિતિને કારણે ગ્રાહકોના ડોલર મેળવવા માટે જ્વેલરી રિટેલર્સ વચ્ચે તીવ્ર સ્પર્ધા જોવા મળશે. જ્વેલરીએ માત્ર અન્ય જ્વેલરી બ્રાન્ડ્સ સામે જ નહીં, પરંતુ રેડીમેડ કપડાં (એપેરલ), ઇલેક્ટ્રોનિક્સ, પ્રવાસન (ટ્રાવેલ) અને મનોરંજન જેવા ક્ષેત્રો સામે પણ સખત સ્પર્ધા કરવાનો વારો આવશે.

જોકે, આ નકારાત્મક વલણ વચ્ચે જ્વેલરી ક્ષેત્ર માટે આશાનું એક કિરણ પણ જોવા મળ્યું છે. સર્વે અનુસાર, મોટી ઉંમરની પેઢીઓની તુલનામાં ‘જેન ઝી’ (Gen Z – યુવા વર્ગ) ગ્રાહકોએ જ્વેલરી અને એક્સેસરીઝની ખરીદીમાં વધુ રસ અને વધુ ખર્ચ કરવાની ઈચ્છા દર્શાવી છે.

બીજી તરફ, અન્ય એક વૈશ્વિક મેનેજમેન્ટ કન્સલ્ટિંગ ફર્મ ‘બેન એન્ડ કંપની’ (Bain & Company) ના પૂર્વાનુમાન અનુસાર, નવેમ્બર અને ડિસેમ્બરના તહેવારોના ગાળા દરમિયાન અમેરિકાનું કુલ હોલિડે રિટેલ વેચાણ ૪.૫% ના વાર્ષિક વધારા સાથે $૧.૦૧૬ ટ્રિલિયન (આશરે ૧.૦૧૬ લાખ કરોડ ડોલર) ના રેકોર્ડ સ્તરે પહોંચી શકે છે. પરંતુ બેન એન્ડ કંપનીએ સ્પષ્ટતા કરી છે કે આ નોમિનલ વધારામાંથી અડધાથી વધુ હિસ્સો વાસ્તવિક વેચાણના વોલ્યુમ વધવાને બદલે ‘મોંઘવારી’ (ઈન્ફ્લેશન) ને કારણે જોવા મળશે. આ સંસ્થાના અંદાજ મુજબ, ઇન-સ્ટોર (ઓફલાઇન) વેચાણમાં ૨.૫% નો વધારો થશે, જ્યારે ઇ-કોમર્સ અને મેઇલ ઓર્ડર સહિતના નોન-સ્ટોર વેચાણમાં ૯% નો મોટો ઉછાળો જોવા મળી શકે છે.

આમ, એક તરફ સમગ્ર યુએસ હોલિડે રિટેલ માર્કેટ ઓવરઓલ ગ્રોથ તરફ આગળ વધી રહ્યું છે, ત્યારે બીજી તરફ જ્વેલરી ઉદ્યોગ ગ્રાહકોના ઘટતા રસ અને કાપ મૂકવાના વલણ સામે મોટો પડકાર અનુભવી રહ્યો છે.

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube