DIAMOND CITY NEWS, SURAT
વૈશ્વિક લક્ઝરી ફેશન ક્ષેત્રની અગ્રણી કંપની કેરિંગ (Kering) દ્વારા પેરિસ હાઉટ કોતુર વીક (Paris Haute Couture Week) દરમિયાન યોજાયેલા એક ભવ્ય સમારોહમાં ‘બીજી કેરિંગ જનરેશન અવોર્ડ X જ્વેલરી’ (Kering Generation Award X Jewellery) ના વિજેતાઓની સત્તાવાર જાહેરાત કરવામાં આવી છે.
કેરિંગના પેરિસ સ્થિત હેડક્વાર્ટરમાં 9 જુલાઈના રોજ યોજાયેલા આ કાર્યક્રમમાં જ્વેલરી ઉદ્યોગમાં ટકાઉપણું (Sustainability) અને પર્યાવરણને અનુકૂળ ક્રાંતિકારી વિચારો રજૂ કરનારા યુવા સર્જકોનું સન્માન કરવામાં આવ્યું હતું.
આ પ્રતિષ્ઠિત અવોર્ડનું આયોજન ‘CIBJO – ધ વર્લ્ડ જ્વેલરી કોન્ફેડરેશન’ના સહયોગથી અને ઇટાલીની પ્રખ્યાત ‘POLI.design – પોલિટેકનિકો દી મિલાનો’ ના વૈજ્ઞાનિક સંકલન હેઠળ કરવામાં આવ્યું હતું. આ સ્પર્ધામાં વિશ્વભરની 10 અગ્રણી યુનિવર્સિટીઓ અને એકેડેમીના વિદ્યાર્થીઓ સહિત કુલ 44 સ્ટાર્ટઅપ્સે ભાગ લીધો હતો.
ઉલ્લેખનીય છે કે કેરિંગ કંપનીએ સૌપ્રથમ વર્ષ 2018માં ચીનથી આ અવોર્ડની શરૂઆત કરી હતી, જેને વર્ષ 2024માં વિસ્તૃત કરીને જ્વેલરી સેક્ટર સુધી લંબાવવામાં આવ્યો હતો. આ વર્ષની સ્પર્ધાની મુખ્ય થીમ “સેકન્ડ ચાન્સ, ફર્સ્ટ ચોઇસ” (Second Chance, First Choice) રાખવામાં આવી હતી, જેનો હેતુ આર્ટિફિશિયલ ઇન્ટેલિજન્સ (AI) અને સર્ક્યુલર ડિઝાઇનના ઉપયોગથી જ્વેલરી ઉદ્યોગના પર્યાવરણીય પ્રદૂષણને ઘટાડવાનો હતો.
“આ અવોર્ડ એ વાતની જીવંત સાબિતી છે કે નવી પેઢી પરંપરાગત કારીગરી, આધુનિક ટેક્નોલોજી અને પર્યાવરણીય જવાબદારીના સમન્વય દ્વારા ટકાઉ જ્વેલરી ઉદ્યોગની વ્યાખ્યાને કેવી રીતે નવેસરથી વ્યાખ્યાયિત કરી રહી છે. ફાઇન જ્વેલરીનું ભવિષ્ય હવે ઇકો-ફ્રેન્ડલી ઇનોવેશન પર નિર્ભર છે.” — મેરી-ક્લેર દાવેઉ, ચીફ સસ્ટેનેબિલિટી ઓફિસર (Kering)
આ વર્ષના વિજેતાઓ અને તેમની ક્રાંતિકારી શોધો :
- સ્ટુડન્ટ કેટેગરી (ચીન) : આ કેટેગરીમાં ચીનની યાંગ યુચાન તેમના પ્રોજેક્ટ ‘પર્ચિંગ વિલો’ (Perching Willow) માટે વિજેતા જાહેર થઈ હતી. તેણે ફેંકી દેવામાં આવેલી જૂની કોમ્પેક્ટ ડિસ્ક (CDs) નો ઉપયોગ કરીને, પરંપરાગત ચાઈનીઝ લાકડાની લાખ (Lacquer) કામગીરી અને મધર-ઓફ-પર્લ (છીપ) ની જડતર કળાના મિશ્રણથી આધુનિક જ્વેલરી તૈયાર કરી છે. તેણે નકામા કચરામાંથી અસલી મોતી જેવી કુદરતી ચમક પેદા કરીને સૌને આશ્ચર્યચકિત કર્યા છે. ઇનામ સ્વરૂપે યાંગને કેરિંગના પ્રખ્યાત જ્વેલરી હાઉસ ‘પોમેલાટો’ (Pomellato) માં 6 મહિનાની ઇન્ટર્નશિપ કરવાની તક મળશે.
- સ્ટાર્ટઅપ કેટેગરી (ફ્રાન્સ) : આ કેટેગરીમાં ફ્રાન્સની જિયોજેમ્સ (GeoGems) કંપનીએ તેના પ્રોજેક્ટ ‘ઓરિજેમ્સ’ (OriGems) માટે જીત મેળવી છે. આ એક અત્યાધુનિક વૈજ્ઞાનિક ટ્રેસેબિલિટી સોલ્યુશન છે, જે કિંમતી રત્નો (Gemstones) ક્યાંથી અને કઈ ખાણમાંથી આવ્યા છે તેની વૈજ્ઞાનિક રીતે ચકાસણી કરે છે. અત્યાર સુધી જ્વેલરી માર્કેટ માત્ર કાગળના દસ્તાવેજો પર નિર્ભર રહેતું હતું, પરંતુ આ શોધથી રત્નોની અસલી ઓળખ વૈજ્ઞાનિક રીતે પ્રમાણિત કરી શકાશે. આ કંપનીને પોલિટેકનિકો દી મિલાનોના નિષ્ણાતો તરફથી ટેક્નોલોજીના વધુ વિકાસ માટે મેન્ટરશિપ (માર્ગદર્શન) આપવામાં આવશે.
અવોર્ડ સમારોહના અંતે CIBJO ના પ્રમુખ ગાયતાનો કેવલિયેરીએ જણાવ્યું હતું કે, ફાઇનલિસ્ટના તમામ પ્રોજેક્ટ્સ આજના નવા યુગના ગ્રાહકોની અપેક્ષાઓ અને વૈશ્વિક પર્યાવરણીય મૂલ્યોને સંપૂર્ણપણે પ્રતિબિંબિત કરે છે અને આગામી સમયમાં જ્વેલરી ઉદ્યોગ કઈ દિશામાં આગળ વધશે તેનો સચોટ રોડમેપ પૂરો પાડે છે.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
