DIAMOND CITY NEWS, SURAT
ભારતીય ઝવેરાત ક્ષેત્રના સૌથી વિખ્યાત પ્રદર્શન IIJS સિગ્નેચર 2024 માટે જેમ્સ એન્ડ જ્વેલરી એક્સપોર્ટ પ્રમોશન કાઉન્સિલ (જીજેઈપીસી) દ્વારા સ્ટોલ ડિસ્ટ્રીબ્યુશનની કામગીરી શરૂ કરવામાં આવી છે. સંસ્થા દ્વારા ગઈ તા. 24મી નવેમ્બરના રોજ મુંબઈના ભારત ડાયમંડ બુર્સ (બીડીબી)માં આયોજિત એક કાર્યક્રમમાં ઇન્ડિયા ઈન્ટરનેશનલ જ્વેલરી શો (આઈઆઈજેએસ) સિગ્નેચર માટે સ્ટોલ ફાળવણી કરવામાં આવી હતી. શોમાં ગયા વર્ષે ભાગ લેનારા 1300 પ્રદર્શકો પૈકી 500 પ્રદર્શકોએ પોતાના બુથ જાળવી રાખ્યા છે. સ્ટોલ ફાળવણીમાં બાકીના 800થી વધુ પ્રદર્શકો ફિઝિકલી તેમજ ઓનલાઈન મુંબઈ, દિલ્હી, સુરત, જયપુર, કોલકત્તા અને ચેન્નાઈની જીજેઈપીસીની રિજનલ કચેરીમાં હાજર રહી બુકિંગ કરાવ્યા હતા.
IIJS સિગ્નેચર એક સાથે બે અલગ અલગ સ્થળો પર યોજાશે. બાન્દ્રા ખાતે બીકેસીમાં આવેલા જીયો વર્લ્ડ કન્વેન્શન સેન્ટરમાં 4 થી 7 જાન્યુઆરી 2024 દરમિયાન અને ગોરેગાંવના બોમ્બે એક્ઝિબિશન સેન્ટર ખાતે તા. 5થી 8 જાન્યુઆરી દરમિયાન આ શોનું આયોજન થશે. ઇન્ડિયા જેમ્સ એન્ડ જ્વેલરી મશીનરી એક્સપો (IGJME) પણ તા. 5થી 8 જાન્યુઆરી 2024 દરમિયાન બીઈસી ગોરેગાંવ ખાતે યોજાનાર છે.
જીજેઈપીસીના ચેરમેન વિપુલ શાહે કહ્યું કે, આઈઆઈજેએસ સિગ્નેચર 2024 એ ભારતીય જેમ એન્ડ જ્વેલરી ઇન્ડસ્ટ્રી માટે નવા આશાસ્પદ વર્ષની શરૂઆત બની રહેશે. અમે આઈઆઈજેએસ સિગ્નેચર 2024માં પ્રદર્શકો અને મુલાકાતીઓનું સ્વાગત કરવા આતુર છીએ. જે ભારતીય કારીગરી, ડિઝાઈન અને નવીનતાનું શ્રેષ્ઠ પ્રદર્શન બની રહેશે.
તમામ અરજદારો માટે પારદર્શિતા અને નિષ્પક્ષતા સુનિશ્ચિત કરવા માટે સ્ટોલ ફાળવણી ડિજિટલ રીતે હાથ ધરવામાં આવે છે. પ્રદર્શકો ઉપલબ્ધ વિકલ્પોમાંથી તેમની પસંદગીના સ્ટોલ સ્થાનો પસંદ કરવા સક્ષમ છે. GJEPC પ્રદર્શનકર્તાઓને શોની વિગતો, નોંધણી, લોજિસ્ટિક્સ અને અન્ય પાસાઓ અંગે સહાય અને માર્ગદર્શન પણ પૂરું પાડે છે.
GJEPCના નેશનલ એક્ઝિબિશનના કન્વીનર નીરવ ભણસાલીએ જણાવ્યું હતું કે, અમને IIJS સિગ્નેચર 2024 માટે સ્ટોલ ફાળવણીની જાહેરાત કરતાં આનંદ થાય છે, જે જેમ્સ અને જ્વેલરી ઉદ્યોગમાં સૌથી વધુ રાહ જોવાતી ઘટનાઓમાંની એક છે. અમને પ્રદર્શકો તરફથી અભૂતપૂર્વ પ્રતિસાદ મળ્યો છે, જેઓ સ્થાનિક અને આંતરરાષ્ટ્રીય ખરીદદારોને તેમના ઉત્પાદનો અને સેવાઓ પ્રદર્શિત કરવા આતુર છે. અમે સુનિશ્ચિત કર્યું છે કે સ્ટોલ ફાળવણી પ્રક્રિયા તમામ સહભાગીઓ માટે ન્યાયી, પારદર્શક અને અનુકૂળ છે. અમને વિશ્વાસ છે કે IIJS સિગ્નેચર 2024 એક ભવ્ય સફળતા લાવશે અને નવા માપદંડો સ્થાપિત કરશે.
IIJS સિગ્નેચર 2024 ભારત અને વિદેશમાંથી 32,000 થી વધુ વેપાર મુલાકાતીઓને આકર્ષે તેવી અપેક્ષા છે, જેઓ જેમ્સ અને જ્વેલરી ઉદ્યોગમાં નવા ટ્રેન્ડ સેટ કરશે. આ શોમાં ગોલ્ડ અને સીઝેડ જ્વેલરી, ડાયમંડ, જેમસ્ટોન અને અન્ય સ્ટડેડ જ્વેલરી, સિલ્વર જ્વેલરી, આર્ટિફેક્ટ્સ અને ગિફ્ટિંગ આઇટમ્સ, લૂઝ સ્ટોન્સ, લેબોરેટરીઝ અને એજ્યુકેશન, મશીનરી અને ઇન્ટરનેશનલ કંપનીઓ જેવા પ્રોડક્ટ સેક્શન દર્શાવવામાં આવશે.
Disclaimer : This information has been collected through secondary research and Diamond City Newspaper is not responsible for any errors in the same.
______________________________________________________
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM
