DIAMOND CITY NEWS, SURAT
સુરત: ધ જેમ એન્ડ જ્વેલરી એક્સપોર્ટ પ્રમોશન કાઉન્સિલ (GJEPC) ગુજરાત રીજનલ ઓફિસ દ્વારા સુરત રેલવે સ્ટેશન સ્થિત હોટેલ હિલ્ટન ખાતે શનિવારે એક દિવસીય ‘એક્સપોર્ટ કોન્ક્લેવ’નું ભવ્ય આયોજન કરવામાં આવ્યું હતું. GJEPC ગુજરાત રીજનના ચેરમેન જયંતિભાઈ સાવલિયાના નેતૃત્વમાં સ્થાનિક ઉત્પાદકો અને MSME એકમોનું એક્સપોર્ટ વધે તે દિશામાં નક્કર પ્રયાસરૂપે આ કોન્ક્લેવ યોજાયો હતો. આ કાર્યક્રમમાં સુરત અને આસપાસના વિસ્તારોમાંથી 150થી વધુ નાના-મોટા MSME એકમો અને જ્વેલરી મેન્યુફેક્ચરર્સે ઉત્સાહભેર ભાગ લીધો હતો.
આ કોન્ક્લેવમાં વિવિધ ક્ષેત્રના નિષ્ણાતો અને સરકારી વિભાગોના વરિષ્ઠ અધિકારીઓએ મહત્વપૂર્ણ વિષયો પર ઊંડાણપૂર્વક માર્ગદર્શન પૂરું પાડ્યું હતું:
* ફ્રી ટ્રેડ એગ્રીમેન્ટ (FTA) અને ગ્લોબલ માર્કેટ: GJEPCના એક્ઝિક્યુટિવ મેમ્બર શ્રી રાય દ્વારા FTA (મુક્ત વેપાર કરાર) શું છે અને વિવિધ આંતરરાષ્ટ્રીય માર્કેટ્સમાં તેના ફાયદા કેવી રીતે મેળવી શકાય તેની વિગતવાર સમજ આપવામાં આવી હતી. DGFTના અધિકારી શ્રી અભિમન્યુ સરે વૈશ્વિક સ્તરે FTA માર્કેટ્સને સફળતાપૂર્વક કેવી રીતે ટેપ અને ક્રેક કરવા તે અંગે ઊંડાણપૂર્વક ચર્ચા કરી હતી.
* ગોલ્ડ પ્રોક્યોરમેન્ટ અને કસ્ટમ્સ પ્રોસિજર: DGFT દ્વારા જ્વેલરી એક્સપોર્ટ માટે ગોલ્ડ મેળવવા ‘એડવાન્સ ઓથોરાઇઝેશન લાયસન્સ’ની સરળ પ્રક્રિયા સમજાવવામાં આવી હતી. સાથે જ IIBX (ઇન્ડિયા ઇન્ટરનેશનલ બુલિયન એક્સચેન્જ) અને DIL જેવી એજન્સીઓ મારફતે એક્સપોર્ટ માટે સોનું મેળવવાની પદ્ધતિઓ દર્શાવી હતી. કસ્ટમ્સ વિભાગના અધિકારીઓએ ડ્યુટી ડ્રોબેકની પ્રક્રિયા અંગે માર્ગદર્શન આપતાં જણાવ્યું હતું કે કેવી રીતે એક્સપોર્ટ કરીને ભરેલી ડ્યુટી પરત મેળવી શકાય.
* ગ્લોબલ B2B ઈ-કોમર્સ અને લોજિસ્ટિક્સ: અલીબાબા પ્લેટફોર્મના શ્રી સંદીપભાઈ કાથરોટિયાએ ડિજિટલ પ્લેટફોર્મ મારફતે આંતરરાષ્ટ્રીય માર્કેટમાં પ્રોડક્ટ્સનું વેચાણ કરવાની તકો અંગે વિસ્તૃત માહિતી આપી હતી. આ ઉપરાંત લોજિસ્ટિક્સ ક્ષેત્રે અગ્રણી DHL દ્વારા વિશ્વભરમાં B2B મોડલ હેઠળ ઈ-કોમર્સ શિપમેન્ટ કેવી રીતે ગ્લોબલી સરળતાથી પહોંચાડી શકાય તે અંગે પ્રેઝન્ટેશન રજૂ કરવામાં આવ્યું હતું.
* જ્વેલરી બ્રાન્ડિંગ અને ગ્લોબલ એક્સપોઝર: જ્વેલરી સેક્ટરમાં પોતાની બ્રાન્ડ સ્થાપિત કરીને વૈશ્વિક સ્તરે મજબૂત ઓળખ અને એક્સપોઝર કેવી રીતે ઊભું કરી શકાય તે વિષય પર મુંબઈની જાણીતી એજન્સી ‘માઇન્ડ મેપ’ (Mind Map) તરફથી સ્પીકર માનસવી દ્વારા વિસ્તૃત અને અસરકારક પ્રેઝન્ટેશન આપવામાં આવ્યું હતું.
ચેરમેન જયંતિભાઈ સાવલિયાએ જણાવ્યું હતું કે સુરતના MSME જ્વેલરી ઉત્પાદકોમાં વૈશ્વિક સ્તરે સ્પર્ધા કરવાની અપાર ક્ષમતા છે, અને આ પ્રકારના માર્ગદર્શન સત્રોથી નાના ઉત્પાદકો પણ સરળતાથી એક્સપોર્ટ તરફ આગળ વધી શકશે. ઉપસ્થિત તમામ ઉદ્યોગસાહસિકોએ આ આયોજનને ખૂબ જ માહિતીસભર અને સમયસરનું પગલું ગણાવી આવકાર્યું હતું.
Disclaimer : This information has been collected through secondary research and Diamond City Newspaper is not responsible for any errors in the same.
ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.
FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube
