અમેરિકાએ ભારતીય હીરા અને જ્વેલરી પર ૧૦% ટેરિફ યથાવત રાખ્યો

DIAMOND CITY NEWS, SURAT

યુનાઇટેડ સ્ટેટ્સ (અમેરિકા) એ પોતાના વેપાર નિયમોમાં મોટો ફેરફાર કરીને અસ્થાયી ‘સેક્શન ૧૨૨’ સરચાર્જની જગ્યાએ કાયમી ‘સેક્શન ૩૦૧’ ટેરિફ શાસન અમલી બનાવ્યું છે. આ નવા કાયદા હેઠળ ૨૪ જુલાઈ ૨૦૨૬ થી ભારતીય આયાત પર ૧૦% નો વધારાનો કસ્ટમ ટેરિફ યથાવત રાખવામાં આવ્યો છે. આ નીતિ હેઠળ નેચરલ હીરા, લેબગ્રોન હીરા, કલર્ડ જેમસ્ટોન્સ અને તમામ પ્રકારની જ્વેલરી પર ૧૦% ડ્યુટી લાગુ પડશે. 

અમેરિકી પ્રમુખ ડોનાલ્ડ ટ્રમ્પે ૨૩ જુલાઈના રોજ પ્રેસિડેન્શિયલ મેમોરેન્ડમ પર હસ્તાક્ષર કર્યા હતા, જે ૨૪ જુલાઈથી જ અમલી બની ગયો છે. યુએસ ટ્રેડ રિપ્રઝન્ટેટિવ (USTR) દ્વારા વિશ્વના ૬૦ દેશોમાં ‘ફોર્સ્ડ લેબર’ (વેઠમજૂરી) વિરોધી કાયદાઓના અમલીકરણ અંગે કરાયેલી તપાસ બાદ આ નિર્ણય લેવામાં આવ્યો છે. 

ભારતે મેળવ્યો સ્પર્ધાત્મક લાભ : ૧૨.૫% ના બદલે ૧૦% સ્લેબ

ભારતે પ જૂન ૨૦૨૬ પછી દેશમાં મજૂરીથી ઉત્પાદિત વસ્તુઓની આયાત પર કડક પ્રતિબંધો લાદવાની નીતિ અપનાવી હતી. આ પગલાને કારણે અમેરિકાએ ભારતને ૧૨.૫% ના બદલે નીચલા ૧૦% ના ટેરિફ સ્લેબ માં સ્થાન આપ્યું છે. 

આ નિર્ણંયથી ભારતને તેના મુખ્ય સ્પર્ધક દેશો જેવા કે ચીન, હોંગકોંગ, થાઇલેન્ડ, તુર્કી, યુએઈ (UAE), ઇઝરાયેલ અને વિયેતનામ સામે ૨.૫% નો સીધો ટેરિફ લાભ મળ્યો છે, કારણ કે આ દેશો પર ૧૨.૫% નો સેક્શન ૩૦૧ ટેરિફ લાદવામાં આવ્યો છે. 

હીરા અને જ્વેલરી નિકાસકારો પર ટેરિફનો બોજ

ભલે ભારતને અન્ય દેશોની સરખામણીએ ફાયદો થયો હોય, પરંતુ ભારતીય નિકાસકારો માટે પડકારો યથાવત છે : 

• પોલિશ્ડ કુદરતી હીરા અને જેમસ્ટોન્સ : અગાઉ અમેરિકામાં શૂન્ય ડ્યુટી (MFN) હેઠળ પ્રવેશતા કટ અને પોલિશ્ડ હીરા તથા રંગીન રત્નો પર હવે પૂરો ૧૦% ડ્યુટી બોજ રહેશે. 
• લેબગ્રોન હીરા : લેબગ્રોન ડાયમંડ (LGD) અને સિન્થેટિક સ્ટોન્સ પર પણ ૧૦% ડ્યુટી લાગુ રહેશે. 
• જ્વેલરી એક્સપોર્ટ : જ્વેલરી પર અગાઉથી લાગતી ૫.૫% થી ૬% ની MFN ડ્યુટી ઉપરાંત આ નવો ૧૦% સેક્શન ૩૦૧ ટેરિફ ઉમેરાશે, જેથી કુલ અસરકારક આયાત જકાત વધીને ૧૫.૫% થી ૧૬% થઈ જશે. 

યુરોપિયન દેશો સાથેની અસમાનતા અને પડકાર

જેમ એન્ડ જ્વેલરી એક્સપોર્ટ પ્રમોશન કાઉન્સિલ (GJEPC) એ આ ટેરિફ માળખામાં રહેલી એક મોટી વિસંગતતા તરફ ધ્યાન દોર્યું છે. 

અમેરિકાએ યુરોપિયન યુનિયન (જેમ કે બેલ્જિયમ-એન્ટવર્પ), સ્વિટ્ઝર્લેન્ડ અને અમુક દેશોમાંથી આવતા કુદરતી હીરા (HS Codes 7101, 7102, 7103) ને આ સેક્શન ૩૦૧ ટેરિફમાંથી મુક્તિ આપી છે. પરંતુ ભારતને આ મુક્તિ આપવામાં આવી નથી. આ કારણે યુરોપ કે સ્વિટ્ઝર્લેન્ડમાં કટ થયેલા હીરા અમેરિકામાં ડ્યુટી-ફ્રી પહોંચશે, જ્યારે તે જ ગુણવત્તાના ભારતીય હીરા પર ૧૦% ટેરિફ લાગશે. 

બીજી તરફ, બોત્સ્વાના, નામિબિયા, કોંગો, ઝિમ્બાબ્વે અને ટાન્ઝાનિયા જેવા કાચા હીરા (Rough Diamonds) ઉત્પન્ન કરતા દેશો આ ટેરિફના દાયરા બહાર છે. જોકે, આ દેશોના રફ હીરા જો ભારતમાં પ્રોસેસ (સબ્સ્ટેન્શિયલ ટ્રાન્સફોર્મેશન) થઈને અમેરિકા જશે, તો તેના પર ‘ઇન્ડિયન ઓરિજિન’ ગણીને ૧૦% ટેરિફ વસૂલવામાં આવશે. 

એર કાર્ગો અને કુરિયર માટે મુક્તિ નહીં

અમેરિકાએ આ ટેરિફમાંથી ‘ઇન-ટ્રાન્ઝિટ’ (રસ્તામાં રહેલા માલ) માટે મર્યાદિત રાહત આપી છે. જે માલ ૨૪ જુલાઈ પહેલાં જહાજ (Ocean Freight) પર લોડ થઈ ગયો હોય તેને ૨૮ જુલાઈ સુધી મુક્તિ મળશે. 

પરંતુ, ભારતમાંથી મોટા ભાગના હીરા અને જ્વેલરીનું ટ્રાન્સપોર્ટેશન એર કાર્ગો, કુરિયર કે હેન્ડ-કેરી મારફતે થાય છે, અને આ માધ્યમોને આ મુક્તિનો લાભ આપવામાં આવ્યો નથી. 

નિકાસકારોને સલાહ

જીજેઈપીસીએ તમામ ભારતીય જ્વેલરી નિકાસકારોને કસ્ટમ્સ બ્રોકર્સ સાથે મળીને નવા HTSUS હેડિંગ 9903.05.44 હેઠળ સચોટ ડોક્યુમેન્ટેશન કરવા અને ટેરિફ વર્ગીકરણની ચકાસણી કરવા સલાહ આપી છે. આ ઉપરાંત, અમેરિકાથી પરત આવતા માલ (Returned Goods) પર પણ આ ટેરિફ લાગુ થઈ શકે છે, તેથી યુએસ કસ્ટમ્સના સ્પષ્ટ ઓર્ડર વિના કોઈ પણ ધારણા ન બાંધવા કડક સૂચના આપી છે. 

---

Disclaimer : This information has been collected through secondary research and Diamond City Newspaper is not responsible for any errors in the same.

ડાયમંડ સિટી પર ગુજરાત, રાષ્ટ્રીય, આંતરરાષ્ટ્રીય, બિઝનેસ સહિતના હીરા ઉદ્યોગના તમામ સમાચાર વાંચો. લેટેસ્ટ ન્યૂઝથી અપડેટ રહેવા માટે સોશ્યિલ મીડિયામાં અમારી સાથે જોડાઓ.

FACEBOOK | TWITTER | TELEGRAM | PINTEREST | LINKEDIN | INSTAGRAM | WhatsApp | YouTube